Sunday, August 9, 2015

ජයම්පති වික්‍රමරත්නගේ එක්සත් ජාතික පක්ෂකරනය

චාර්ය ජයම්පති වික‍්‍රමරත්න එලැඹෙන මහ මැතිවරනයේ දී එජාප මන්ත‍්‍රීධූර අපේක්ෂකයෙක් ලෙස නම් කොට තිබේ. හෙතෙම ලංකා සමසමාජ පක්ෂයේ මධ්‍යම කාරක සභාවේ ප‍්‍රකට සාමාජිකයෙකි. ආචාර්ය වික‍්‍රමරත්න සමග ලසසප හා කොමියුනිස්ට් පක්ෂවල විකල්ප කන්ඩායම් ද එජාපයට මැතිවරනයේ දී සහයෝගය දීමට තීන්දු කොට ඇත. මෙම විකල්ප කන්ඩායම් බිහිවූයේ මෙම පක්ෂ පසුගිය ජනාධිපතිවරනයේ දී මහින්ද රාජපක්ෂට සහය දීමට ගත් තීන්දුවට විරුද්ධවය. තම පක්ෂ කාලයක් තිස්සේ අනුගමනය කල රාජපක්ෂවාදී ප්‍රතිපත්තියට එරෙහිව කැරලි ගැසූ සමසමාජ-කොමියුනිස්ට් විකල්ප කන්ඩායම් ‘වමේ කේන්ද්‍රය’ නමින් විවිධ වැඩසටහන් හා සම්මන්ත‍්‍රන ද පසුගිය කාලයේ සංවිධානය කලේය.

මේ අතර ප්‍රකට මාධ්‍යවේදී ගුනසිරි සිල්වා පසුගිය දිනෙක ‘අවිචාර සමය’ නමින් කෘතියක් එලිදැක්වීය. මෙම කෘතිය සමන්විතව තිබෙන්නේ රාජපක්ෂ පාලන සමය තුළ ඔහු විසින් එක්සත් ජාතික පක්ෂයේ නිල පුවත්පත වන ‘සියරට’ පුවත්පතට ලියනු ලැබූ කතුවැකි සමූහයකිනි. ගුනසිරි සිල්වා එක්තරා යුගයක ප‍්‍රකටව සිටියේ වාමාංශික සිනමා විචාරකයෙක් ලෙසයි. බී.ඒ. සිරිවර්ධනගේ කර්තෘත්වය යටතේ කොමියුනිස්ට් පක්ෂයේ ‘ඇත්ත’ පුවත්පත පලවන යුගයේ එම පුවත්පතට සිනමා විචාර සැපයූ ප‍්‍රමුඛ විචාරකයා වූයේ ගුනසිරිය. පුවත්පතකට සම්මුඛ සාකච්ඡාවක් දෙමින් ගුනසිරි කියා තිබ‍ුනේ 'ලිබරල් රනිල්' සාපේක්ෂව ඉදිරිගාමී නායකයෙක් බවයි.

අප දැන් දැන් දකින මේ ප්‍රවනතාව, එනම් වාමාංශික කොටස් එජාපය සමග සන්ධානගත වීම තරමක අලුත් ප‍්‍රවනතාවයක් යැයි කිව හැක. සාම්ප‍්‍රදායිකව අප දුටුවේ වාමාංශිකයින් ලෙස තමුන්ව හදුන්වා ගන්නා පිරිස් ශ‍්‍රී ලංකා නිදහස් පක්ෂය සමග සන්ධානගත වීමය. එහෙත් දැන්, බහුලව පෙනෙන්නේ එහි ප්‍රතිවිරුද්ධ පැත්තට සිදුවීම් පෙල ගැසෙන ආකාරයයි. එජාපය වූ කලී මෙරට ප‍්‍රභූ පංතිය නියෝජනය කරන දක්ෂිනාංශික පක්ෂයකි යන සංකල්පනය සාම්ප‍්‍රදායිකව වාමාංශිකයින්ගේ ‘සාමාන්‍ය දැනුම’ තුල තිබූ සංකල්පනයකි. ගුනසිරි සිල්වා වැනි කෙනෙක් එජාපය ගැන එකල දැරූ ආකල්පය වටහා ගැනීමට ඔහුම ලියා ඇති 'පිහාටු පෑනේ කතාව' නම් වූ ඔහුගේ ස්වයං චරිතාපදානය කියැවීම ප්‍රමානවත්වය. එලෙස එජාපය ස්වකීය පරම සතුරා ලෙස සැලකූ වාමාංශිකයින් පවා මෙලෙස එජාපය සමග හරි හරියට කාන්ඩගත සිත්ගන්නා සුලු නිරීක්ෂනයකි.

මෙබදු කාන්ඩ ගැසීමකට බලපෑ පසුබිම කුමක්ද? රාජපක්ෂ යටතේ අප දුටුවේ ශ‍්‍රීලනිපය වේගයෙන් ජාතිවාදීකරනය වීමකි. එම ජාතිවාදීකරනයට සමගාමීව විශාල අධිකාරිවාදයක් එම පක්ෂ පාලනය වටා ඒකරාශී විය. අද එජාපයට, විශේෂයෙන්ම එහි රනිල් වික‍්‍රමසිංහ නායකත්වයට, සහයෝගය දෙන බොහෝ වාමගාමී කොටස් ඒ කෙරෙහි යොමුවීමට බලපෑ එක් හේතුවක් වන්නේ මෙන්න මේ ජාතිවාදය පිලිබද ප‍්‍රශ්නයයි. ඔවුන් තමන්ගේ ආස්ථානයන් සාධාරනීකරනය කරගන්නේ ද ජාතිවාදය නමැති සාධකය හුවා දැක්වීම මගිනි. ජාතිවාදී මහින්දට වඩා එහෙම නොවන රනිල් හොදයි. තර්කය එන්නේ ඒ විදිහටය.

ප‍්‍රශ්නය මෙයයි. ‘වමේ කේන්ද්‍රයට’ හෝ තමන් ‘වාමාංශික’ ලෙස හදුන්වගන්නා කවරෙක්ට, තමා වාමාංශික යැයි කියා ගන්නා ගමන් මේ වර්ගයේ ආස්ථානයන්ට එලැඹිය හැක්කේද? ඉහත කී 'ජාතිවාදී මහින්දට එරෙහිව එහෙම නැති/ එය අඩු රනිල්' තර්කයේ දෝෂය නම් රනිල්ව හෝ මහින්දව ඔවුන් ක්‍රියාත්මක වෙන සමස්තය තුල තබා සංයුක්තව කියවාගන්නේ නැතිව, තමා ඔවුන් තුල දකින්නට කැමති ලක්ෂනයක් වියුක්ත කොට ගෙන, එය උත්කර්ෂයට නගාලීමයි.

මෙන්න මෙතැනදී ‘වාමාංශය’ යනු කුමක්ද යන අතිශය මූලධාර්මික ප‍්‍රශ්නය නැවතත් වර නැගීමට අපට සිදුවේ. ඓතිහාසිකව වාමාංශික ලෙස හදුන්වනු ලැබූයේ සමාජ සාධාරනත්වය වෙනුවෙන් සහ වඩා සමානාත්මතාවාදී  ( Egalitarian )  සමාජයක් වෙනුවෙන් පෙනී සිටි දේශපාලන කන්ඩායම්ය. ධනවාදය විසින් ඇති කරන අසමානතාවාදී සමාජ සම්බන්ධතා වාමාංශික කොටස් වෙතින් විවේචනයට ලක්විය. මෙම අසමානාත්මතාවාදී සමාජ ව්‍යුහයන්ට/ සමාජ සම්බන්ධතාවලට එරෙහිව අරගල කිරීම ඒ අනුව වාමාංශිකත්වයේ අනන්‍යතාවයයි. ස්ලැවෝයි ජිජැක්ගේ නාමකරනයක් නයට ගෙන කියන්නේ නම් සමාජයේ ‘ඇතුලත් කරගනු ලැබූවන් ’ (Included)   ගේ ආධිපත්‍යය යුක්ති යුක්ත කරන සංස්ථාවන්ට එරෙහිව ‘බැහැර කරනු ලැබූවන් ’  ( Excluded) ගේ විමුක්ති අභිලාෂයන් නියෝජනය කිරීම, එකී විමුක්ති අභිලාෂයන් සංවිධානය කිරීම වාමාංශයේ ඓතිහාසික කාර්යය වූයේය. වාමාංශය ‘වාමාංශය’ වන්නේ එය සතු මෙන්න මේ සුවිශේෂී අනන්‍යතාවය නිසාය.

විප්ලවවාදී සමාජවාදීන් වේවා සමාජ ප‍්‍රජාතන්ත‍්‍රවාදීන් හෝ ප‍්‍රතිසංස්කරනවාදී සමාජවාදීන් හෝ වේවා, නව සමාජ ව්‍යාපාරවලට අයත් විවිධ ප‍්‍රවනතා හෝ වේවා - මේ සියල්ලෝ අඩු වැඩි වශයෙන් ඉහත කී අනන්‍යතාවය තුල ස්ථානගත වූවෝ වූහ.

ශ‍්‍රීලනිපය මෙන්ම එජාපයත් අප සමාජයේ පවතින අසමානාතාවාදී සමාජ සැකැස්ම පවත්වාගෙන යන බල ව්‍යුහයන්ය. එනම් ‘ඇතුලත් කරගනු ලැබූවන්’ ගේ දේශපාලන අභිලාෂයන් මෙකී පක්ෂ විසින් නියෝජනය කරයි.

අප සලකා බලන එජාපය පිලිබද නිශ්චිත උදාහරනය ගතහොත් එජාපය යනු ශ‍්‍රමයේ සංවිධානාත්මක බලයට එරෙහි ප‍්‍රාග්ධනයේ ප‍්‍රහාරය නියෝජනය කරන නව ලිබරල්වාදය ලංකාවට හදුන්වාදුන් පක්ෂයයි. එම ප්‍රහාරය සංවිධානය කල පක්ෂයයි. පසුගිය දිනෙක ‘සත්හඩ’ පුවත්පතට සම්මුඛ සාකච්ඡාවක් දෙමින් එහි නායක රනිල් වික‍්‍රමසිංහ පවසා තිබුනේ 1981 අධ්‍යාපන ධවල පත‍්‍රිකාව ක‍්‍රියාත්මක වූයේ නම් අද තිබෙන අධ්‍යාපන ප‍්‍රශ්න බොහොමයක් විසදී තිබෙනු ඇති බවයි. අධ්‍යාපන ධවල පත‍්‍රිකාව වූ කලී අධ්‍යාපනය පෞද්ගලිකකරනය කිරීමට කැදවුම් කල , දහස් ගනන් ශිෂ්‍යයින් හා කම්කරුවන්ගේ විරෝධයට පාත‍්‍ර වූ ගර්හිත ලියැවිල්ලකි. මහජන විරෝධතා නිසා එවකට අධ්‍යාපන ඇමති වූ රනිල් වික්‍රමසිංහට එම ලියැවිල්ල හකුලා ගැනීමට සිදුවූ අතර එම ලියැවිල්ලේ අන්තර්ගතය වෙනුවෙන්, එනම් අධ්‍යාපනය පුද්ගලිකකරනය වෙනුවෙන්, හේ මේ මොහොතේ දීත් විවෘතව පෙනී සිටින්නේ එසේය.

එමතු නොව එජාපයේ ප‍්‍රතිපත්ති ප‍්‍රකාශනය ගෝලීය ප‍්‍රාග්ධනයට සහන දෙන නිදහස් වෙලද කලාප පන්නයේ අධි ආර්ථික කලාපවලින් යුක්ත සංවර්ධන වැඩසටහනක් යෝජනා කරයි. කම්කරුවන්ගේ අර්ථසාධක අරමුදල්වල පාලනය පෞද්ගලික අංශයට පැවරීමේ යෝජනාවක් පවා එය විසින් ප‍්‍රසිද්ධියේ ඉදිරිපත් කොට ඇත. ජයම්පති වික්‍රමරත්න එජාපයේ මේ සාර්ව ආර්ථික ප්‍රවේශය ගැන දරන අදහස කුමක්ද? කම්කරු නීති ලිහිල් කොට කම්කරුවන් සූරාකෑම සදහා පහසුකම් ප්‍රාග්ධනයට සපයා දෙන අධි ආර්ථික කලාප ඇතිකිරීම එජාපය තමන්ගේ මුඛ්‍ය ආර්ථික උපාය මාර්ගය ලෙස ඉදිරිපත් කොට තිබෙන සන්දර්භයක ඒ ගැන ගුනසිරි සිල්වාට කියන්නට තිබෙන්නේ කුමක්ද?

හුදෙක් රනිල් ජාතිවාදී නැහැ යන අදහස ඉදිරිපත් කිරීම තුල ඉහත කී කිසිවක් නිශේධනය වන්නේද? පවතින අධිපති සමාජ සම්බන්ධතා / ව්‍යුහයන් ප‍්‍රතිනිෂ්පාදනය කිරීමට එජාපය දක්වන පුරෝගාමී දක්ෂිනාංශික මැදිහත්වීම නමැති සමස්තය ජාතිවාදය පිලිබද එක් නිරීක්ෂනයක් මත අමතක කොට දැමිය හැකිද? අනාගතයේ දී එජාප අනුග‍්‍රහය මත ඇතිවන අධි ආර්ථික කලාප තුල ගෝලීය ප‍්‍රාග්ධනය විසින් වැටුප් ශ‍්‍රමිකයන් දුෂ්කර ශ‍්‍රම කොන්දේසි තුල සූරාකෑමට ලක්වෙන විට එජාපයෙන් පාර්ලිමේන්තු යන ජයම්පති වික‍්‍රමරත්න ගැනීමට බලාපොරොත්තු වෙන්නේ කාගේ පැත්තද?  තතු මෙසේ වනවිට වරප‍්‍රසාදලාභීත්වයට එරෙහිව නිර්වරප‍්‍රසාදිතයන් සංවිධානය කිරීමේ වාමාංශයේ ඓතිහාසික රැඩිකල් අර්ථයට සිදුවන්නේ කුමක්ද? එම සුවිශේෂී රැඩිකල් අර්ථය අත්හරින වමේ කේන්ද්‍රය තවදුරටත් ‘වමේ කේන්ද්‍රයක්’ යැයි කිව හැකිද? විවිධ හේතු හුවා දක්වමින් එජාපය හෝ ශ‍්‍රීලනිපය සමග කාන්ඩගත වන ‘වාමාංශිකයින්ගෙන් ’ අප ඇසිය යුතු මූලධාර්මික ප‍්‍රශ්න මේවාය.


5 comments:

  1. No, Mr, being against separatist movement helped and sustained by the west, is not being racist! Those who help Tamil racism are really racist because they want to dismember SL which is a necessity of the USA policy.
    No, Jayampathi and others have been bought! Dollar play the main role! JVP so called non recist leader Anura K received dollar form USA embassy and this was revealed by Wikileleaks! If one cannot understand today's USA foreign policy maintained by Neo-cons in the state department no political phenomenon cannot be understood! Our only political scientist who understand this situation is Dr Dayan Jayathilaka.

    ReplyDelete
  2. දැනුම ප්‍රාග්ධනය වන සමාජයේ දැනුමට නිසි මිල ලැබෙන විට සම්මත පුතිපත්ති බිඳවැවට්

    ReplyDelete
  3. This comment has been removed by the author.

    ReplyDelete
  4. This comment has been removed by the author.

    ReplyDelete
  5. "එම ලියැවිල්ලේ අන්තර්ගතය වෙනුවෙන්, එනම් අධ්‍යාපනය පුද්ගලිකකරනය වෙනුවෙන්, හේ මේ මොහොතේ දීත් විවෘතව පෙනී සිටින්නේ එසේය." - රතුපාට කමිසය හැඳගැනීමට පෙර මේ තොප්පිය ගැලවිය යුතු බව අප වෘත්තීය සමිති නායකත්වයටද නොපෙනීම පලමු ඛේදවාචකයයි

    කැත්ලීන් ජයවර්ධන, සුමිත්‍රා රාහුබද්ධ ආදීන්ගේ නවකතාවලට වූ අබග්ගයම වමට සිදුවීම නම් මා දකින දෙවැනි ඛේදවාචකයයි.

    ReplyDelete