මහනායක හිමියන්ට ප්‍රාග්ධනය මුන ගැසීම / Asgiri Mahanayaka : confronted by the Capital

වංක සහයෝගයේ පිරිත් නූල 

අස්ගිරි පාර්ශවයේ මහනායක උඩුගම ශ්‍රී බුද්ධරක්ඛිත හිමි මහනුවර නගරයේ රාත්‍රී මෝටර් රථ ධාවන තරග පැවැත්වීම සම්බන්ධයෙන් පසුගිය සතියේ සිය විරෝධය පල කරන ලදී.කාල්ටන් ස්පෝට්ස් නෙට්වර්ක් ආයතනයේ මාධ්‍ය අනුග්‍රහය යටතේ සංවිධානය වු රාත්‍රී මෝටර් රථ ධාවන තරගාවලිය ( Kandy night races) මාර්තු 17,18 
17 සහ 18 දෙදින තුල මහනුවර නගරයේ පැවැත්විනි.රාත්‍රී 7.30 සිට ඊලග දිනයේ පාන්දර වන තුරු මෙම ක්‍රීඩා සැනකෙලිය පැවැත්වුනු අතර එහි ධාවන පථය වැටී තිබුනේ ශ්‍රී දලදා මාලිගාව අබියසිනි.පොලිස්පතිතුමා හමු වූ බුද්ධරක්ඛිත හිමි මේ සම්බන්ධව සිය අප්‍රසාදය පලකොට තිබූ අතර මහනුවර නගරය පූජනීය නගරයක් බවත් ඒ කරුන නොතකා ඇතැම් දේශපාලකයන් පිරිසක් විසින් ක්ෂනිකව මුදල් උපයනු වස් මෙම තරග සංවිධානය කොට තිබෙන බවත් එහිදී උන්වහන්සේ චෝදනා කල බව මාධ්‍ය විසින් වාර්තා කර තිබුනි.මේ පිලිබද උන්වහන්සේ ජනාධිපතිවරයාට පැමිනිලි කල කල්හි තමා එවැනි තරගාවලියක් පවත්වන්නේද යන්න ගැන නොදන්නා බවට හෙතෙම මහනායක හිමිට ප්‍රකාශ කල බව මාර්තු 16 දින ද අයිලන්ඩ් පුවත්පත වාර්තා කලේය.

මහනුවර නගරයේ රාත්‍රී නිසංසලභාවය දෙබෑ කරමින් දලදා මාලිගාව ඉදිරියෙන් හඩ නගමින් මෝටර් රථ විදුලි වේගයෙන් ගමන් කිරීම සහ රැසව සිටින දහස් ගනන් ජනයා ඒ අභියස ඔල්වරසන් හඩ නැගීම මාලිගාවේ පූජනීයත්වයට හානිකර වූවක් ලෙස අස්ගිරි මහනායක හිමි සැලකුවා විය හැක.වැඩවසම් යුගයේ රාජ්‍යත්වයේ සංකේතය වූ දලදාව ආරක්ෂා කිරීමේ වගකීම පැවතියේ අස්ගිරි - මල්වතු විහාර ද්වයට වන අතර එකල කලබලකාරී තත්වයක් උද්ගත වූ කල්හි අස්ගිරි විහාරවාසී භික්ෂූන් දලදාව තමා භාරයේ තබාගත් බව කියැවේ.අදත් මාලිගාවේ තේවාවන් සහ වෙනත් වතාවත් සිදුකෙරෙනුයේ අස්ගිරි - මල්වතු විහාරවල අධීක්ෂනය යටතේය.මේ අනුව දලදාවේ ආරක්ෂාව පූර්ව ධනවාදී ආසියාතික යුගයේ සිට මහනායකවරුන් මත පැවරී තිබෙන වගකීමකි.ඝෝෂාකාරී නයිට් රේස් වල කලබගෑනියෙන් දලදාවේ පූජනීයත්වය රැකගැනීමේ උවමනාව මහනායක හිමි තුල පහල වනුයේ එම පාරම්පරික රාජකාරිය උන්වහන්සේගේ සිත්හි පවත්නා බැවින් විය හැකිය.

මහනායක හිමිගේ විරෝධය කවරක් වුවද නයිට් රේස් තරග යනු පශ්චාත් යුද ශ්‍රී ලංකාවේ සිදුවෙමින් පවතින ධනේශ්වරකරනයේ ස්වභාවය හකුලුවා දක්වන උත්සවකාරී ප්‍රකාශනයකි.පසුගිය දෙසැම්බර් මස අග කොලඹ නගරයේ මෙවැනිම රාත්‍රී මෝටර් රථ ධාවන තරගාවලියක් පැවැත්වුනු අතර ඒ සදහා කොලඹ වීදි කඩා නැවත සකස් කිරීමට පවා රජය ‍කටයුතු යෙදීය.තරග සදහා අවශ්‍ය වැලි ගෝනි ඇදීම සදහා ආරක්ෂක අමාත්‍යංශය හමුදා භටයින් අනුයුක්ත ක‍ලේය.ශක්තිමත් නිෂ්පාදන පදනමක් රහිත පරිභෝජනය උත්කර්ෂයට නැංවුනු සමාජයක් තුලට ප්‍රාග්ධනය ගෙන්වා ගැනීම සදහා මෙවැනි සැනකෙලි අවශ්‍ය කෙරේ.සංචාරකයන් ඉලක්ක කොටගෙන දියත් කෙරෙන සී ප්ලේන් ව්‍යාපෘති හා සමගාමී ශ්‍රේනියක ලා මෙවැනි ක්‍රීඩා සැනකෙලි සැලකිය යුතුය.කොලඹ නයිට් රේස් තරග සදහා විදේශීය ධාවකයින්ද සහභාගී විය.ධනවාදයේ මෙම මොහොත තුල ලංකාව වැනි සමාජයක් තුල මේවා වූ කලී ධනය උපදවන වැදගත් ආර්ථික ක්‍රියාවෝ වෙති.ආරක්ෂක අමාත්‍යංශය කොලඹ වීදි පවා කඩමින් නැවත හදමින් මේ සදහා මැදිහත් වන්නේ එම වැදගත්කම නිසාය.

අනිත් අතට දේශපාලන අධිකාරීන්ගේ පැත්තෙන් බැලූ විට මෙවැනි සැනකෙලි ආර්ථික වාසි ගෙන එන කෙටි හා පහසු මූලාශ්‍රයන්ය.කාල්ටන් ස්පෝට්ස් නෙට්වර්ක් යනු රූපවාහිනී කර්මාන්තය තුල පාතාල පන්නයේ තරගකරුවෙකි.සියලුම ක්‍රීඩා තරගවල ආවරන අයිතිය දැන් එම ආයතනයට නතුවෙමින් තිබෙන්නේ දිවයිනේ ක්‍රීඩා සම්බන්ධ පරම විකාශන අයිතිය අදාල ආයතනය සතු වූවාක් සේය.මෙම ආයතනය ජනාධිපතිවරයාගේ පවුලේ ව්‍යවසායක් බව මෙහිදී අමුතුවෙන් සදහන් කල යුතු නැත.

දැන් උඩුගම බුද්ධරක්ඛිත හිමිට ධනවාදය මුන ගැසී තිබේ.වැඩවසම් යුගයේ රජුට අනුශාසනා කිරීම සදහා පිහිටවූ ආයතනයක වර්තමාන අධිපති වන මෙම හිමි නම නයිට් රේස් පිලිබද වර්තමාන "රජුට' පැමිනිලි කල විට උන්වහන්සේට ලැබෙන්නේ නියම පිලිතුරකි.ජනාධිපතිතුමා ඒ ගැන කිසිවක් දන්නේ නැත.සිය පුත්‍රයාගේ රූපවාහිනි නාලිකාව මාධ්‍ය අනුග්‍රහය සපයන මෙම තරගාවලිය ගැන තමුන් කිසිවක් නොදන්නා බව ජනාධිපතිවරයා කියද්දී එය මුසාවක් බව උඩුගම බුද්ධරක්ඛිත හිමි නොදන්නවා නොවේ.නමුත් කල හැක්කේ කුමක්ද?අස්ගිරි මහනායක යනු මේ යුගය තුල තවදුරටත් සීරියස් චරිතයක් නොවන බව උන්වහන්සේම දනී.දේශපාලකයින් තමුන්ව බැහැදකින්නට එන්නේ බොරුවට බව උන්වහන්සේලා දනිති.තමුන් එහිදී දේශපාලකයන්ට කරන "අනුශාසනා" ද අමුතු යමක් නොව "කවුරු කවුරුත් සමගි විය යුතුයි " වැනි දෙකේ පංතියේ ලමයෙකුට වුවද දිය හැකි පොදු සරල "උපදෙස්" බව උන්වහන්සේලා නොදන්නවා නොවේ.ඒ කියන දේ පාලකයන් සීරියස් ගනන් නොගන්නා බව උන්වහන්සේලා ඊටත් වඩා දනිති.තමුන් කරන්නේ බොරුවක් බව දැන දැනම උන්වහන්සේලා පාලකයන් සමග මෙම ව්‍යාජ කෙලියෙහි නියුතු වෙති.පාලකයන් වෙත ප්‍රශස්ති කියති.පිරිත් නූල් බදිති.වැඩවසම් යුගයේ තමුන් ලද රාජ්‍ය අනුග්‍රහය දිගටම ලබාගැනීම සදහා වංක සහයෝගයෙන් කටයුතු කරති.

ප්‍රසිද්ධ අවකාශයේදී සිංහල ජනමනස ආස්වාදයෙන් කිතිකැවීම සදහා මහනායකවරු අභියස වැදවැටෙන පාලකයින් සැබෑ ලෝකයේදී සැබැවින්ම  ආදරය කරන්නේ පැරනි ගතානුගතික ආසියාතික චාරිත්‍රයන්ට නොව ධනවාදයටය.දලදාවේ පූජනීයත්වය පිලිබද රොමෑන්ටික සෞන්දර්ය රූපයට වඩා මහපොලොවේ පවතින ප්‍රාග්ධනය සැබෑවකි.එය ස්පර්ශ කල හැක.දිව ගෑ හැක.භෞතිකව ආශ්වාදනය කල හැක.යෝෂිත රාජපක්ෂ මෙන්ම ඔහුව ශාන්ත තෝමස් විද්‍යාලයට යැවූ රාජපක්ෂ පියානන්ද මෙම භෞතික සත්‍යය ඉතා හොදින් දනී.මේ අනුව භූමිතෙල්ද?මවුබිමද?යනුවෙන් අ‍පගෙන් අහන පාලකයන්ගෙන් අප පෙරලා  ඇසිය යුත්තේ දලදාවද?නයිට් රේස්ද? යන වඩා යථාර්තවාදී ප්‍රශ්නයයි.

සිවිල් යුද්ධය ජංගම දුරකථනගත වීම

හමුදා සෙබලුන් පිරිසක් විසින් දූෂනය කොටමරා දමා තිබෙන බවට සැලකිය හැකි එල්.ටී.ටී.ඊ සටන්කාරියකගේ තැතිගන්වන සුලු ඡායාරූප පෙලක් මේ දිනවල අන්තර්ජාලයේ සංසරනය වෙමින් පවතී.සොල්දාදුවන් එම මෘත ශරීරයේ යට ඇදුම් පහත් කොට සිය ජංගම දුරකථන භාවිතා කරමින් රහස් අවයවන්ගේ පින්තූර ගන්නා ආකාරය  එම ඡායාරූප වල සටහන්ව තිබේ.මෙම ඡායාරූප පෙල පසුගිය වසරේ බ්‍රිතාන්‍යයේ චැනල් 4 රූපවාහිනී සේවාව විසින් ප්‍රචාරය කල Sri Lankan killing fields  වාර්තා වැඩසටහනේ අඩංගු වූ මීට සමාන දර්ශනයක් සිහිගන්වයි.නිරුවත් කරනු ලැබූ ගැහැනු මල සිරුරු සමූහයක් සමග හමුදා සෙබලුන් පිරිසක් විනෝද වන ආකාරය එම වීඩියෝ දර්ශනය මගින් පිලිබිඹු වූ අතර ජංගම දුරකථන යොදාගෙන මෘත ශරීරවල රහස් තැන් රූපගත කරන ආකාරය එමගින්ද දැක්වුනි.

යුද භූමියේදි සොල්දාදුවන්  ජංගම දුරකථන භාවිතා කොට සිය මතක සටහන් ලෙස රූගත කරගත් දෑ මෙලෙස එලියට පැමිනීමත් සමග යුද්ධය පිලිබද බාහිර ලෝකයා නොදත් බොහෝ කරුනු හෙලිදරවු වීම ආරම්භ වි තිබේ.සිවිල් යුද සමයේදී දෙස් විදෙස් ජනමාධ්‍ය රජයේ දැඩි පාලනයට යටත් වූ අතර පුවත් වාර්තා කිරීම සදහා ස්වාධීනව යුද බිමට  යාමට මාධ්‍යවේදීහු අවසර නොලද්දාහ.රජය විසින් සංවිධානය කරන සංචාර පැකේජ් හරහා මාධ්‍යවේදීන් යුදබිමට ගිය අතර එලෙස නික්මුනු මාධ්‍යවේදීහු "වන්නි සටන","රනබිමෙන් අටට" වැනි රියැලිටි වැඩසටහන් දකුනේ සිංහල ප්‍රෙක්ෂකයා වෙත ගෙන ආහ.දකුනේ මධ්‍යම පංතික ප්‍රේක්ෂකයා යුද්ධය කියවා ගත්තේ සිය ආලින්දයේ වාඩි වී බට්ටි හෝ පබා ප්‍රචාරය වීමට පෙර විකාශය වූ මෙවැනි රියැලිටි වැඩසටහන් හරහාය.

මෙබදු වැඩසටහන් සහ රජයේ නිල ප්‍රචාර මගින් මේ අනුව මැවුනු චිත්‍රයක් විය.ජනාධිපතිවරයාගේ වචනයෙන් කිවහොත් අපගේ සොල්දාදුවන් රනබිමට ගියේ අතෙකින් තුවක්කුවත් අනෙත් අතින් එක්සත් ජාතීන්ගේ මානව හිමිකම් ප්‍රඥප්තියත් රැගෙනය.ආරක්ෂක ලේකම්වරයාට අනුව යුද්ධය කිසිදු සිවිල් වැසියෙකුට හානි නොවන ආකාරයට ( Zero single casualties) සිදුකරන ලදී.එම මෙහෙයුම මානුශික මෙහෙයුමක් වූ අතර දමිල ජනයා කොටි සංවිධානයේ ආඥාචක්‍රයෙන් ගලවා ගැනීම හැර අනෙක් අරමුනක් එහි නොවීය.

මෙම ෆැන්ටසිය තුල ස්වප්නගතව සිටි දකුනේ ප්‍රේක්ෂකයා සැබැවින්ම උතුරේ සිදුවනුයේ කවරක්දැයි නොදත්තේය.තමා රූපවාහිනියෙන් නරඹමින් සිටි රමනීය රියැලිටි වැඩසටහන උත්කර්ෂයට පත් 2009 මැයි 19 වනදා මේ අනුව ප්‍රීත්‍යෝනමාදයෙන් ඔවුහු ඔල්වරසන් නැගූහ.

සොල්දාදුවන්ගේ මොබයිල් වීඩියෝ සහ සේයා රූ හරහා දැන් එලියට එමින් තිබෙන්නේ වන්නි සටන වර්ගයේ යුදකාලීන රියැලිටි වැඩසටහන් වලට හසු නොවුනු රියැලිටියයි.රනබිමට යන සොල්දාදුවා තුවක්කුව හා මානව හිමිකම් ප්‍රඥප්තියට අමතරව ජංගම දුරකථන ද රැගෙන ගොස් තිබෙන බව ජනාධිපතිවරයාට අමතක වූවා විය හැක.වසර කිහිපයකට පෙර කාන්දු වූ නිරුවත් කොට අත් ගැටගසනු ලැබූ කොටි සටන්කරුවන් පිරිසක් සොල්දාදුවන් විසින් වෙඩි තබා මරා දමන දර්ශනය සහිත වීඩියෝව මෙලෙස ප්‍රසිද්ධියට පත් පලමු වීඩියෝවයි.යුද්ධයකදී යටත් වන අයවලුන් මරාදැමීම ( Extra judicial killings) ජාත්‍යන්තර යුද නීතියට අනුව බරපතල වරදක් වන නිසා මෙම වීඩියෝව එකල මහත් ආන්දෝලනයක් ජනිත කලේය.මේ සම්බන්ධව රජයේ ක්ෂනික ප්‍රතිචාරය වූයේ මෙම දර්ශන ව්‍යාජ ඒවා බවත්,මේ සියල්ල රටට එරෙහිව සිදුකරන කුමන්ත්‍රනයක ප්‍රතිඵල බවත්ය.රජය පමනක් නොව එවකට මෙරට ප්‍රධාන වාමාංශික පක්ෂයක ප්‍රචාරක ලේකම්වරයා පවා මෙම ජංගම දුරකථන වීඩියෝව මාධ්‍ය ඉදිරියේ විස්තර කලේ "කුමන්ත්‍රනයක්" ලෙසය.

ඉන්පසු 2010 ජූනි මාසයේදි මෙවැනි ජංගම දුරකථන වීඩියෝ පට රාශියක් ඇතුලත් කොට චැනල් ෆෝ නාලිකාව සිය වාර්තා වැඩසටහන නිෂ්පාදනය කලේය.මෙම වීඩියෝ පට හා ඡායාරූප යුද්ධය පිලිබදව මවා තිබූ රමනීය චිත්‍රය තූ තූ කර දැමිමෙහිලා සමර්ථය.නිරුවත් ගැහැනු මල සිරුරු සමග කුනුහරුප කියමින් කෑ ගසමින් විනෝද වන සාමාන්‍ය පිරිමියෙකුගේ දර්ශනය  සමග වීරෝදාර මානුශික රනවිරුවා පිලිබදව මවා තිබුනු චිත්‍රය අනන්‍ය කිරීම එතරම් පහසු නොවේ.රජය විසින්ම පත්කල උගත් පාඩම් හා ප්‍රතිසන්ධාන කොමිසම අදාල වීඩියෝ පට පිලිබද පරීක්ෂනයක් පැවැත්විය යුතු බවට නිර්දේශ කොට තිබේ.යුද්ධය යනු දකුනේ මධ්‍යම පංතිකයා පරිකල්පනය කරගෙන සිටි ආකාරයේ වීරෝදාර,රමනීය මානුශික මෙහෙයුමක් නොව ප්‍රචන්ඩත්වයෙන්,මානව හිමිකම් කෙලෙසීම්වලින් හා පිලිකුල් සහගත හැසිරීම් වලින් කිලිටි වී ගිය ගොරතර  ක්‍රියාදාමයක් බව මේ වනවිට සැගවිය නොහැකි ලෙස හෙලිදරවු වෙමින් පවතී.

ධනේශ්වර හමුදාව වූ කලී ධනේශ්වර රාජ්‍යයේ සාහසික මර්ධකයායි.රාජ්‍යයට කවර අන්දමකින් හෝ අභියෝග කරන්නේ කවර සමාජ කොටසක්ද රාජ්‍යය විසින්  කිසිදු මානව චර්යා ධර්මයක් නොතකා එම අභියෝගය චප්ප කර දමනු ඇත.එම චප්ප කරදැමීමේ සාහසිකත්වය දමිලයාගේ සිට හලාවත ධීවරයා දක්වා සියල්ලන්ටම පොදුය.එහි කිසිදු වෙනසක් නැත.මානුශික මෙහෙයුම්, Zero civilian casualties  වැනි ප්‍රබන්ධයන් ගත වන මොහොතක් පාසා කඩා හැලෙමින් තිබේ.රජය යුද්ධය සදහා පැරා මිලිටරි කන්ඩායම් යොදාගත් බවත් ඔවුන් අපරාධ කල බවත් පිලිගැනීමට එල්.එල්.ආර්.සී කමිටුවට සිදුව තිබේ.ලොව වඩාත්ම විනයගරුක හමුදාව සිය හමුදාව බවට පාරම් බෑ ආරක්ෂක බලධාරීන්ට දැන් අශෝභන සිදුවීම් සිදුව තිබේ නම් ඒ ගැන පරීක්ෂන පවත්වන බවට මූනිච්චාවට හෝ කීමට සිදුව තිබේ.ඉතිහාසයට බොරු කල නොහැක.ඉතිහාසය අවසානයේ ජයග්‍රහනය කරනු ඇත.යුද්ධය යනු රියැලිටි වැඩසටහනක්වත් විසිල් ගැසිය යුතු කානිවල් එකක්වත් නොව බිහිසුනු ඝාතනවලියක් බවටත්,හමුදාව පිලිබද රනවිරු ලේබලය පාලකයින්ගේ දෘෂ්ටිවාදී කෙබරයක් බවත් අනාගතය විසින් ඉගෙනගන්නවා ඇත.

[[රාමචන්ද්‍ර සටහන 2012.03.18 - ජනරල ඉරිදා සංග්‍රහය ]]

නානායක්කාර මහතා සහ කරුනාරත්න මහතා / Mr.Nanayakkara and Mr.Karunarathna

නම - වාසුදේව නානයක්කාර , ආගම - යූඇන්පී විරෝධය 

"වාසුදේව - මේ ආන්ඩුවත් යන්නේ අධිරාජ්‍යවාදී මාවතේමයි.අපි හදන්නේ එමගින් මුදවලා නිවැරදි මගට ගන්න.

ප්‍රශ්නය - එහෙනම් ඔබලාට ආන්ඩුවෙන් ඉවත් වීමට පවා සිදුවන්න පුලුවන් නේද?

වාසුදේව - නැහැ.අපි ආන්ඩුවෙන් යන්නෙ නැහැ.අපි ගියොත් ආන්ඩුවක් කොහෙද තියෙන්නෙ.එහෙම උනොත් එජාපය බලයට එයි.අපි ඒකට ඉඩ තියන්නෙ නැහැ."

මෙම සම්මුඛ සාකච්ඡාව 1996 දී ප්‍රකාශයට පත් සිතිජය වාර සගරාවේ කලාපයකින් උපුටා ගන්නා ලද්දකි.1996 වන විට පොදුජන එක්සත් පෙරමුනු ආන්ඩුව බලයට පත්ව වසර දෙකක් ගතව තිබුනි.එම ආන්ඩුව විසින් 1995 හටගත්  උද්ඝෝෂනයකදී කම්කරුවෙකු වෙඩිතබා මරා දැමීම එවකට විශාල ආන්දෝලනයක් ජනිත කලේය.එජාපයේ විවෘත ආර්ථික ගමන් මාර්ගයෙන් කැඩී වෙන් වන බවට ප්‍රතිඥා දී බලයට පැමිනි චන්ද්‍රිකා බන්ඩාරනායක ලිබරල් ධනවාදයේ උද්යෝගිමත් සත්කාරිකාවක බවට මේ වනවිට පත්වී සිටියාය.

එවකට ආන්ඩු පක්ෂ මන්ත්‍රී වාසුදේව නානායක්කාර තමාම සාමාජිකයෙකුව සිටි ආන්ඩුවේ ගමන පුවත්පත් සාකච්ඡාවකදී විවේචනය කරන්නේ එවැනි සන්දර්භයක් තුලය.පොදු පෙරමුන පැරනි "අධිරාජ්‍යවාදී" මාර්ගයේම ගමන් කරමින් සිටින බව පවසන වාසුදේව ඉන්පසු එම කරුන මත ආන්ඩුවෙන් ඉවත් වනවාද යනුවෙන්  මාධ්‍යවේදියා නගන ප්‍රශ්නය අභිමුව ආරක්ෂාකාරී පහරකට යොමුවේ."එජාපය බලයට පත්වීමට ඉඩ තිබෙන නිසා" තමා එවැන්නක් නොකරන බව එහිදී හෙතෙම පවසයි.ඒ වසර 16 ට ඉහතදීය.

ඉතිහාසයේ සමානතා නිර්මානය වන ආකාරය එක් අතෙකින් හාස්‍යජනක වන්නේය.පසුගිය ඉරිදා (පෙබරවාරි 26) මව්බිම සතිඅන්ත පුවත්පතට සම්මුඛ සාකච්ඡාවක් ලබාදී තිබූ වියපත් වාසුදේව නානායක්කාර ජාතික ප්‍රශ්නය සම්බන්ධව ආන්ඩුව ජාතිවාදී ලෙස කටයුතු කරන බවට මැසිවිලි නගා තිබුනි.කන්තලේ අක්කර හාරසියයක් රාජපක්ෂ සහෝදරයින් විසින් සමාගමකට විකිනීමට දැරූ ප්‍රයන්තයක් පිලිබද ද හෙතෙම එහිදී පැමිනිලි කොට තිබුනි.තමා රාජ්‍ය භාෂා ඇමතිවරයා ලෙස සියලුම රාජ්‍ය ආයතනවල නාමපුවරු භාෂා ත්‍රිත්වයෙන්ම තිබිය යුතු බවට තීන්දු කලත් ආරක්ෂක ලේකම්වරයා එම තීරනය කිසිදු ලෙසකින් නොතකන බවට ඔහු පුවත්පත් ඉදිරියේ නෝක්කාඩු නගා තිබුනේ සති කිහිපයකට පෙරදීය.

වාසුදේව නානායක්කාර - ඔහු තමන්ව හදුන්වාගන්නා පරිදි - ලිබරල් ධනවාදයට,ඒකාධිපතිවාදයට විරුද්ධය.ජාතීන්ගේ සමානත්මතාවය සහ ප්‍රජාතන්ත්‍රවාදයට පක්ෂය.එසේවුවද මෙම දේශපාලඥයා මෑත ඉතිහාසයේ බිහිවූ වඩාත්ම ජාතිවාදී,වඩාත්ම අධිකාරිවාදී වඩාත්ම නව ලිබරල්වාදී ආන්ඩු තන්ත්‍රයේ ඇමතිවරයෙකු වන්නේය."ඔබ මෙම ජරපත් රජයට සහය දෙන්නේ ඇයි"දැයි විමසූ විට නානායක්කාරගේ මුවග පවතිනුයේ "එජාපයට අවස්ථාවක් දිය නොහැකිය" යන පහසු පිලිතුරයි.

වැල් මී සමග මිශ්‍ර වූ කූනිස්සෝ 

මෙහිදී අපට මෙසේ විමසිය හැක.වාසුදේව නානායක්කාර යනු තක්කඩියෙක්ද?තමා නියෝජනය කරන රෙජිමය තමා ප්‍රකාශ කරන දෙයෙහි සම්පූර්න පරස්පරය බව දනිමින්ම සිය පැවැත්ම සදහා ආන්ඩුවේ ලැගසිටින නරුමයෙක්ද?එසේත් නැතිනම් එජාපය බලයට ඒම වලක්වමින් තමා සැබැවින්ම යහපත් කාර්යයක් ඉටු කරමින් සිටී යැයි ඔහු සද්භාවයෙන්ම විශ්වාස කරනවාද?

ඉහත ප්‍රශ්න මදක් විවෘතව තබා අප නානායක්කාරගේ මෙම භාවිතය ඔහුගේ නිවුන් අනෙකා යැයි සිතෙන තරමට පොදුජන ව්‍යවහාරය තුල ඔහුගේ නම සමග කියැවෙන (වාසු-බාහු) වික්‍රමබාහු කරුනාරත්න මහතාගේ භාවිතය සමග අභිමුඛ කරමු.වාසුදේව මෙන්ම වික්‍රමබාහු ද සමසමාජ සම්ප්‍රදාය මගින් ශික්ෂනය ලැබූ දේශපාලකයන් වන අතර 1976 දී සමසමාජ පක්ෂයේ සභාග දේශපාලනය කෙරෙහි විවේචනයක් සහිතව ඉන් කැඩී පිහිටවූ නව සමසමාජ පක්ෂයේ ආරම්භක නායකයෝ වූහ.

ජනවාරි 01 දින ලක්බිම ඔහුගේ කොලමට "ශක්තිමත් නොවන වමක් සහ රනිල්ගේ අභියෝග" නමින් ලිපියක් ලියන වික්‍රමබාහු මෙසේ ලියයි."මේ වෙලාවේ ජාතිවාදී නවලිබරල්වාදී රජයට එක්තරා අභියෝගයක් කල නායකයෙක් හැටියටයි රනිල් ඉදිරියට ඇවිත් ඉන්නේ.වම ශක්තිමත් නැති වෙලාවේ එයාගේ ඒ අභියෝගය වැදගත්.ඒ වම කල යුතු වැඩක් තරමකට හෝ ඔහුගෙන් වන නිසයි"

වික්‍රමබාහු තමා එක්සත් ජාතික පක්ෂය සමග පවත්වන සම්බන්ධතාවය "වැඩි නරකට එරෙහිව අඩු නරක" සූත්‍රය මගින් විග්‍රහ කරනු ලබයි.එනම් ජාතිවාදී මහින්දට වඩා ලිබරල්වාදී රනිල් හොදය.රනිල් වික්‍රමසිංහ නව ලිබරල්වාදයට එරෙහි සමාජ ප්‍රජාතන්ත්‍රවාදී නායකයෙක් ලෙස වික්‍රමබාහු සිය තීරු ලිපිවල බොහෝ අවස්ථාවලදී විස්තර කරයි.වාසුදේවට අනුව අධිරාජ්‍යවාදී රනිල්ට වඩා ජනතාවාදී මහින්ද හොදය.වාසු සහ බාහු දෙදෙනාම මේ අනුව බැලූ බැල්මට පරස්පර මාර්ග දෙකකින් ගොස් ලගාවනුයේ එකම මංසන්ධියටය.වඩා නරක ධනේශ්වර නායකයෙක් වෙනුවට ඊට වඩා "ටිකක් හොද" ධනේශ්වර නායකයෙක් පිලිබද මොවුන් දෙදෙනාම පරිකල්පනය කරයි.වාසුදේව සිය ටිකක් හොද ධනේශ්වර නායකයා ලෙස රාජපක්ෂ තෝරාගනිද්දී වික්‍රමබාහු රනිල් වික්‍රමසිංහ සිය සගයා ලෙස තෝරා ගනී.

මෙම දේශපාලකයන්ගේ හිස්වල තිබෙන ධනපති පක්ෂවල සාපේක්ෂ හොද නරක පිලිබද සියලු ඇගැයුම් හුදු පරිකල්පනයන් පමනි.ලංකාව වැනි පසුගාමී රටක බෙලහීන ධනපති පංතිය නව ලිබරල්වාදයට එරෙහි පවුරක් වන්නේ යැයි සිතීමම ප්‍රලාපයකි.මෙම යුගයේදී ගෝලීය ධනවාදය සමග සුරතල් වීම හැරෙන්නට මෙම දුබල ධනේශ්වර නායකයන්ට අන් විකල්පයක් නැත.සමසමාජයෙන් රැඩිකල් විවේචනයක් සහිතව කැඩී ආ හිටපු ‍ට්‍රොට්ස්කිවාදී නායකයන් දෙදෙනා මෙය නොදන්නවා විය හැකිද?

වම මේ මොහොතෙහි ප්‍රබල නැතිනම් සිදුකල යුත්තේ වමේ දේශපාලනය ශක්තිමත් කිරීම වෙනුවෙන් සටන් කිරීමද?එම සටන අතහැර එක් හෝ වෙනත් ප්‍රභූ නායකයෙකු වඩා ප්‍රගතශීලි යැයි ඒත්තු ගන්වනු වස් තර්ක සම්පාදනයෙහි යෙදීමද?

චෞරත්වයට එරෙහිව සම්මුති විරහිතව සටන් කිරීම මිස එක් කොල්ල කල්ලියකට එරෙහිව තවෙකක් සමග සිටගැනීම - කෙතරම් අවංක වාමාංශිකයෙකු වුවද - වාමාංශිකහරනය කිරීමෙහි සමත්ය.වාම දේශපාලනයෙහි යෙදීමේ විශ්වාසය සහ ධෛර්යය නොපවතී නම් යමෙක් කෙතරම් දේශපාලන න්‍යාය උගතෙකු වුවද ඔහුව ක්‍රමය විසින් ජීරනය කරගන්නවා ඇත.