Sunday, April 17, 2011

එක්සත් ජාතීන්ගේ කමිටුව හා ජාතිහිතෛශී සැනකෙලිය - 2

2009 මැයි මාසයේ සිවිල් යුද්ධය අවසන් වනවාත් සමග එක්සත් ජාතීන්ගේ මානව හිමිකම් කවුන්සිලය ඉදිරියේ ලංකා රජයට එරෙහි යුද අපරාද යෝජනාවක් විවාදයට ගැනුනි.එම විවාදය ලංකා රජය වෙත ජයගෙන දෙමින් අවසන් විය.මෙහිදී එවකට එම කවුන්සිලය තුල ලංකා රජය නියෝජනය කල දයාන් ජයතිලක කොටි සංවිධානයට එරෙහිව රජය කල යුද්ධය හැදින්වූයේ "සාධාරන යුද්ධයක්" (just war) ලෙසය.එබදු යුද්ධයකදී මානව හිමිකම් උල්ලංඝනය වීම සදහා ඉඩක් පවතින බව ජයතිලක පිලිගත්තේය.නමුත් එවැන්නක් දෙස සාධාරන ලෙස බැලිය යුතු බවත්,පශ්චාත් යුද කාලය තුල එකී වැරදීම්ද මගහරවා ගත් විනිවිද පෙනෙන,සියලු ජනවර්ගයන්ට සාධාරනය ඉටු කෙරෙන වැඩපිලිවෙලකට යාමට සිය රජය ඉටා සිටින බවත් එම නිසා තමාට එරෙහි චෝදනා පරාජය කරන ලෙසත් එහිදී කවුන්සිලයෙන් ඉල්ලා සිටින ලදී.රජයේ මෙම ඉල්ලීමට මානව හිමිකම් කවුන්සිලය සාධනීයව ප්‍රතිචාර දැක්වූ අතර එසේ සාධනීය ප්‍රතිචාරයක් දැක්වීමට කවුන්සිලයේ බොහෝ රටවල් පෙලඹවූ කරුන වූයේ යුක්තිසහගත ක්‍රියාමාර්ගයක් අනුගමනය කිරීම සම්බන්ධව රජය විසින් දෙන ලද ප්‍රතිඥාවයි.

2009 මැයි මාසයේ සිට වසර දෙකක් ගිය තැන දැන් අපට ප්‍රශ්න කල හැක - ගෙවුනු කාලය තුල පාලකයන් විසින් සිදුකරන ලද්දේ කුමක්ද?දයාන් ජයතිලක පොරොන්දු වූ ආකාරයේ විනිවිද පෙනෙන සුලු වැඩපිලිවෙලක් මෙරට තුල දියත් වී තිබේද?මෙය අමතක කොට මූන්ගේ වාර්තාව වියුක්තව ගැනිම කිසිසේත්ම තර්කානුකූල නැත.

උතුරේ හමුදා පාලනය වෙනුවට සාමාන්‍ය සිවිල් පාලනයක් ඇතිකිරීමට රජය විසින් ගත් පියවර මොනවාද?සත්‍යය නම් කොටි සංවිධානයේ අධිකාරිය වෙනුවට පූර්න මිලිටර් ඒකාධිපතීත්වයක් උතුරේ පලාතේ මේ වනවිට ස්ථාපනය කොට තිබේ යන්නයි.යුද්ධයෙන් පසුත් යාපන අර්ධද්වීපයේ සෑම පුරවැසියෙක්ම හමුදා රෙජිස්ටරවල අනිවාර්යයෙන් ලියාපදිංචි විය යුතු බවට නාසි පන්නයේ වැඩපිලිවෙලක් ක්‍රියාවෙහි යෙදවින.පවුලේ සියලු සාමාජිකයන් දැක්වෙන සමූහ ඡායාරූපයක් සෑම නිවෙසක් ඉදිරියේම එල්ලා තැබිය යුතු බවටත්,ඉන් බැහැර අමුත්තෙකු නිවෙසක නතර වන්නේ නම් ඒ සදහා අසල හමුදා කදවුරින් විශේෂ අවසරයක් ගතයුතු බවටත් නියෝග නිකුත් කෙරින.රජයට හැර අන් කිසිවෙකුට අර්ධද්වීපය තුල දේශපාලනය කිරීමෙහි ඉඩක් නොවීය.පලාත් පාලන මැතිවරනයේදී දෙමල ජාතික සන්ධානයට වවුනියාවේ ගමින් ගමට කැන්වසින් යාමේදී විශේෂ හමුදා අවසර ලබාගැනීමට සිදුවිය.යාපනයේ අතුරුදහන් වූවන් සම්බන්ධව කතාකිරීමට ගිය සුනිල් හදුන්නෙත්ති වැනි සිංහල ජාතික මන්ත්‍රීවරුන්ගේ පවා ඔලු රජය විසින් පලාදමන ලදී.උතුරේ ජනජීවිතය සාමාන්‍යකරනය කරනවා වෙනුවට ඒ මත විශේෂ හමුදා පීඩනයක් දිගින් දිගටම රදවා ගනු ලැබුනි.

අවතැන් වූවන් සම්බන්ධ තත්වය මෙහිලා වැදගත් වන අනෙත් ගැටලුවයි.යුද්ධයෙන් අවතැන් වූ ජනයා යලි පදිංචි කිරීම සදහා සෑහීමට පත්විය හැකි වැඩපිලිවෙලකට රජය අවතීර්න වූවාද?දැයට කිරුල හම්බන්තොට මහින්ද රාජපක්ෂ ක්‍රීඩාංගනය වැනි සමයම් වැඩවලට දෙන ලද ප්‍රමුඛත්වයවත් මෙම අතිශය සංවේදී කරුනට හිමි වූවාද?ජාතික වශයෙන් අතිශය වැදගත් මෙම කාර්යයෙන් අනෙත් සියලු ‍දේශපාලන පක්ෂ,සිවිල් සංවිධාන හා ජනමාධ්‍ය ඈත් කරනු ලැබුවා නොවේද?
අත්අඩංගුවට පත්වූ දමිල රැදවියන් සම්බන්ධ තත්වය කුමක්ද?ඔවුන් සම්බන්ධ සාධාරනය ඉටු වූවාද?අවම වශයෙන් අත්අඩංගුවට පත්වූ අයගේ නාමලේඛනයක්වත් රජය විසින් ප්‍රකාශයට පත්කොට තිබේද?.සිය දරුවා මිය ගියේද/අතුරුදහන් වුයේද/අත්අඩංගුවේ සිටීද යන්න ගැනවත් නොදන්නා දහස් ගනන් මවුවරු උතුරේ සිටිති.පාලකයන් මේ සම්බන්ධව ක්‍රියාකොට තිබෙනුයේ මොවුන් වූ කලී මිනිස් ධූවිලි විශේෂයකි යන ආකල්පයෙන් නොවේද?

මානව හිමිකම් කඩවීමක් සම්බන්ධව තවදුරටත් රජයේ ආයතන වලින් පිලිසරන පැතීමේ අවකාශයක් පවතීද?විධායකය විසින් කෙරෙන මානව හිමිකම් කඩකිරීමකදී පුරවැසියන්ට පිලිසරන පැතිය හැකි ආයතනය ලෙස අධිකරනය හැදින්වේ.හමුදා සොල්දාදුවන් පිරිසක් විසින් ක්‍රිශාන්ති කුමාරස්වාමි නම් දමිල තරුනිය දූෂනය කොට මරා දැමුනු අවස්ථාවේ ඒ පිලිබද නඩු අසා තීන්දු නිකුත් කිරීමට තරම් හෝ යම් විනිවිදභාවයක් මෙරට අධිකරන ක්‍රියාවලිය තුල පැවතුනා යැයි කිව හැක.නමුත් අද වනවිට තත්වය කවරක්ද?එම අවම විනිවිදභාවය හෝ සුරැකි තිබේද?අසාධාරන ලෙස සිරගත කලේ යැයි ජාත්‍යන්තර මානව හිමිකම් කොමිසම විසින් තීන්දු කල නල්ලරත්නම් සිංහරාසාට මෙරට අධිකරනය විසින් ඉටු කල යුක්තිය කුමක්ද?දේශපාලන ගැතිකම මත චන්දන කත්‍රිආරච්චි‍ගේ මිනීමැරුම් පිලිබද අධිචෝදනා ඉවත්කරගන්නා,අබ්දුල් කාදර්ගේ දූෂන චෝදනා ඉවත්කරගන්නා නීතිපතිවරයෙකුගෙන් අපේක්ෂා කල හැකි මානව හිමිකම් සහතිකය කවරක්ද?යුද අධිකරනය වනාහි රටේ පිලිගත් නිල අධිකරන විශේෂයකි යනුවෙන් තීන්දු දීමට තරම් දේශපාලනිකව පක්ෂග්‍රාහී වී ඇති යාන්ත්‍රනයකින් ආරක්ෂා වේ යැයි බලාපොරොත්තු විය හැකි පුරවැසි අයිතියක් තිබේද?

හදිසි නීතිය පිලිබදව දිය හැකි පිලිතුර කවරක්ද?යුද්ධය අවසන්ව වසර දෙකක්ද අවසන් වූ සන්දර්භයක ප්‍රජාතන්ත්‍රවාදී අයීතීන් බරපතල ලෙසින් සීමා කරන හදිසි නීතිය කුමකටද?කාට එරෙහිවද?කා සදහාද?

ඉහත ගැටලු වලට පිලිතුරු දීම මග හැර හුදෙක් මූන්ගේ ජාත්‍යන්තර දෙබිඩිභාවය මත එල්ලීම අර්ථ විරහිත ක්‍රියාවකි.වර්තමාන දේශපාලන තත්වය ඇති වී තිබෙන්නේ ඇයිදැයි යමෙක් අවංකව විග්‍රහ කරන්නේ නම් ඔහුට මෙම කරුනු අනිවාර්යයෙන් සැලකීමට සිදුවනු ඇත.

එල්ටීටීඊ සංවිධානය විනාශ වී ගිය පශ්චාත් නන්දිකඩාල් වපසරිය තුල රාජපක්ෂ පවුල් පාලනය සිත් සේ බඩ පිනුම් ගැසුවේය.උතුරු නැගෙනහිර බිස්නස් සදහා කදිම අවකාශයක් විවර විය.නැගෙනහිර සංචාරක වෙරල තීරය ධනවත් ව්‍යාපාරිකයන් සදහා අලෙවි කරන ලදී.
ප්‍රාග්ධන හිමියන් කෙරෙහි පාලකයන් තුල වූ මෙම තක්කඩි ආදරය පොදු ජනයා කෙරෙහි නොවූ අතර උතුර කෙරෙහි වෙනස් කොට සැලකීමේ ප්‍රතිපත්තියක් දිගින් දිගටම පවත්වා ගන්නා ලදී.උතුර සම්බන්ධව රාජපක්ෂ රජයේ දෙබිඩි ප්‍රතිපත්තියක් වීය යන්න කිසිදු විටෙක ප්‍රතික්ෂේප කල නොහැකි සත්‍යය කරුනකි.බෑන් කී මූන්ගේ වාර්තාව ලංකාවේ ස්වෛරීභාවය කෙරෙහි වන ඇගිලිගැසීමක් නම් එම ඇගිලි ගැසීම සදහා ඉඩ,අවකාශය සහ අවස්ථාව සලසා දෙනු ලැබුවේ පාලකයන්ගේ තක්කඩිකම විසිනි.අඩුම තරමින් යුද කාලයට පසු දයාන් ජයතිලක ජිනිවාහිදී ලෝකයා වෙත ඉදිරිපත් කල පොරොන්දු යෝජනාවලිය හෝ ක්‍රියාවට නැංවී නම් මීට වඩා යහපත් තත්වයක් අපේක්ෂා කල හැකිව තිබුනි.අල් ජසීරා බදු අත්‍යන්තයෙන්ම අමෙරිකානු විරෝධී මාධ්‍ය පවා මේ වනවිට සිටිනුයේ මූන්ගේ වාර්තාවට පක්ෂපාතී ස්ථාවරයකය.පුරවැසියන්ගේ අයිතීන් පාගාදමමින් ජාත්‍යන්තර ඇගිලි ගැසීම් සදහා අවකාශය විවර කොට දුන්නේ රාජපක්ෂ රෙජිමයම මිස අන් කවරෙකු හෝ නොවේ.ස්වෛරීභාවය අනතුරේ හෙලනවා යැයි පාලකයන් මූන්ට ඇගිල්ල දිගු කරද්දී ඇගිලි හතරක් ඔවුන් වෙත එල්ල වී තිබේ.එම ඇගිලි හතරේ ශාපයෙන් ගැලවි යාමට ඔවුන්ට කිසිවිටෙක ඉඩක් නැත.එක්සත් ජාතීන්ගේ දෙබිඩිභාවය තරමටම රාජපක්ෂ රෙජිමයේ මෙම දෙබිඩිභාවයද පිලිකුල් සහගතය.අජූවය.

දැන් අපට අවසාන වශයෙන් ප්‍රශ්නය මෙසේ සාරාංශ කල හැක.තමන්ගේ ඉඩම් උදුරාගෙන සමාගම් වෙත බදු දීමට කැසකවන පාලකයා සම්බන්ධව මැයි 01 දා පානම් පත්තුවේ ජනතාව අනුගමනය කල යුතු ප්‍රතිපත්තිය කුමක්ද?අනුකම්පා විරහිතව පලවා හැරීමට නියමිතව සිටින කොලඹ ප්‍රදේශයේ දහස් ගනන් පැල්පත්වාසීන්,මුඩුක්කු වාසීන් ඔහු අරභයා ගත යුතු ප්‍රතිපත්තිය කුමක්ද?වැටුප් වැඩි කිරීමේ ව්‍යාජ පො‍රොන්දුවෙන් ඔහු විසින් රවටනු ලැබූ රජයේ සේවකයා,විශ්ව විද්‍යාල ආචාර්යවරයා ගත යුතු ස්ථාවරය කුමක්ද?සී ප්ලේන් බෑමේ ව්‍යාපාරවලින් අනාථ කොට තිබෙන මීගමු කලපුවේ ධීවරයා මැයි 01 දා ජනාධිපතිවරයා සම්බන්ධව ගත යුතු ආස්ථානය කවරක්ද?ඔහුගේ ඉල්ලීම පිලිගෙන රටම ඔහු සමග බව පෙන්වීමට මූන්ට එරෙහිව පෙලපාලි යා යුතුද?"රාජ්‍යයේ ස්වාධීනත්වය" උදෙසා ස්වකීය පීඩකයා සමග මෙම ජනතාව සෙනෙහසින් එක් විය යුතුද?

දේශප්‍රේමී ගැලරි කතාවනට වඩා මෙම ප්‍රශ්න ගැඹුරුය.බුද්ධිය වෙහෙසන සුලුය.

27 comments:

  1. ගෙදර මහ එකා නරකයි කියා අල්ලපු ගෙදර එකා ලවා ගැස්සවිය යුතු නැත . රජයේ ක්‍රියාපටිපාටින් තුල මානව හිමිකම් බරපතල ලෙස උල්ලංඝනය වූ අවස්ථා ඕනැ තරම් ඇත නමුත් එය තුන්වන ලෝකයේ රටක සාමාන්‍යයෙන් සිදුවෙන තත්වයන් ඉක්මවා ඇත්තේ සුලු වශයෙනි . රට තුල මානව හිමිකම් ගැටලු හෝ වෙනත් දේශපාලනික ගැටලු නිසා "එක පාර්ශවිය අසාධාරණ වාර්ථාවකට " රට තුලින් සහය දැක්විය යුතු නොවේ

    ReplyDelete
  2. අල් ජසිරා යනු තවදුරටත් ඇමරිකානු විරෝධි මාධ්‍යක් නොවේ , එය මැදපෙරදිග අර්බුදයේදි ඔවුන් හැසිරුන ආකාරයෙන් මනාව ඔප්පු කර ඇත , අනෙක ජාත්‍යන්තර මාධ්‍යක් වශයෙන් ඔවුනගේ හැසිරීම මෙම වාර්ථාව අප විසින්ද පිලිගත යුතුයි යන්න පැහැදිලි නොකරයි , මන්ද ජාත්‍යතර මාධ්‍යක දෘශ්ටි කෝනය හා ශ්‍රි ලාංකික ජනතාවගේ ද්‍රශ්ටි කෝනය එකක් නොවේ

    ReplyDelete
  3. මෙතැන වාර්තාව හා එකඟ වීම හෝ නොවීම පිළිබඳ ගැටළුවක් නෑ. මන්ද එහි කියැවෙන්නේ ඇත්තද බොරුද කියලා තීරණය කරන්න නම් අපත් යුද්දෙ වෙලාවෙ උතුරෙ ඉඳලා එහි වූ දේ මොනවාද කියා දැනගෙන සිටිය යුතුයි. අපි කවුරුත් එසේ නොසිටි හෙයින් මේ කියන දේ ඇත්තද බොරුද කියලා අපිත් කවුරුත් දන්නෙ නෑ. ඒ නිසා වාර්තාව පිළි ගැනීම හෝ ප්‍රතික්ෂේප කිරීම දෙකම අපට කරන්න බෑ.

    "රජයේ ක්‍රියාපටිපාටින් තුල මානව හිමිකම් බරපතල ලෙස උල්ලංඝනය වූ අවස්ථා ඕනැ තරම් ඇත නමුත් එය තුන්වන ලෝකයේ රටක සාමාන්‍යයෙන් සිදුවෙන තත්වයන් ඉක්මවා ඇත්තේ සුලු වශයෙනි "

    මේ වගේ ප්‍රකාශයක් කරන්න නම් එය කරන පුද්ගලයා:

    1. උතුරේ රජයේ හමුදා කළ දේවල් ගැන හොඳින් දැන සිටිය යුතුයි.

    2. තුන්වන ලෝකයේ "සාමාන්‍යයෙන් සිදුවන තත්ත්වයන්" මොනවාද කියා දැන සිටිය යුතුයි.

    අංක 2 කෙසේ වෙතත් 1 ගැනවත් අවබෝධයක් ඇත්තේ යුද්ධය සිදුවන අවස්ථාවේ එහි සිටි හමුදා භටයින්ට හෝ (දෙමළ) සිවිල් වැසියන්ට පමණයි. ඔහු එවැන්නකු නොවේ නම් මෙවන් බොළඳ ප්‍රකාශ කිරීමෙන් වැලකිය යුතුයි.

    අපට කරන්න පුළුවන් එකම දෙය වාර්තාව කියවා බලා අපේ නිගමන වලට පැමිණීම පමණයි. නමුත් කස්ටිය තමන්ගෙ මතය දක්වන්නේ වාර්තාව කියැවීමටත් පෙර. මාරයි.

    ReplyDelete
  4. රාමචන්ද්‍ර මෙ රටෙ බත් කන හරකුන්ට ඔව තේරෙන්නෑ මචෝ.
    ලනු කන්ඩම උප0 ජාතියනෙ.
    ජාතික ආහාරය ලනු,

    ReplyDelete
  5. සිංහලේ දේශප්‍රේමී හැක්පෙටිපොළ බලකායේ නාමල් උඩලමත්තතුමා මිගාර වීරක්කොඩි දොස්තරතුමා හා වැප් නිශාන්තතුමා මේ පිළිබඳව තම මතය නුදුරු අනාගතයේදී පළ කරනු ඇත. විමසිල්ලෙන් සිටින්න.

    ඒ සමඟම පාස් වර්ඩ් ප්‍රොටෙක් කර ගන්නා ලෙස සියළු අවජාතකවාදීන්ට නැවත මතක් කරනු ලැබේ.

    ReplyDelete
  6. @ano1 වාර්ථාවෙ කොටස් මාධ්‍ය වල පලවී ඇත, ඔබ එය කියවා නැති බව පෙනෙතත් රාමච්න්ද්‍ර මෙ ලිපියේ පලමු කොටසේදි ඒහි කාරනා ගැන අදහස් දක්වා ඇති නිසා ඔහු නම් කියවා ඇති බව පැහැදිලිය , යුද්ධය යනු එහි අර්ථයෙන්ම මානව හිමිකම් උල්ලංඝනයකි , එනිසා ලංකාවේ හමුදාව කියා අමුතු වෙනසක් කලා මා අදහස් නොකරයි ගැටලුව ඇත්තේ ඒකපාර්ශවීය කමිටුවකින් සිද්දිය එක් අන්තයකින් පමනක් ලඝු කොට සැලකීමයි , රාජ්‍ය නායකයින් 2 කු ඇතුලු ප්‍රභූන් ගණනාවක් , සිවිල් වැසියන් දහස් ගනන්ක් , ඝාතනය කල සංවිධානයකට එරෙහිව යුධ වැදීමට සිදු වුනු කාරනා මේ කමිටුව විසින් අවධානයට ලක්කර නැත , 30 වසරක යුද්ධයේ අවසන් අදියර ගැන පමණක් කතා කිරීමෙන් හා ඒ සඳහා එක් පාර්ශවයකට අදාල මුලාශ්‍ර පමණක් යොදාගැනීමෙන් අදාල කමිටුව පිලිබඳ බලවත් සැකයක් ඇතිවේ එවන් කමිටු වාර්ථාවකට ලාංකිකයින් හැටියට විරුද්ධ වනවා විනා මහින්ද සමඟ ඇති වෛරයන් පිරිමැසීමට යොදාගතය්තු නොවේ , ඇස් කන් ඇරගෙන ලෝකය දිහා බලනවා නම් තුන්වන ලෝකයෙ රටවල මානව හිමිකම් ගැන ඔබටම දැක ගත හැකි වනු ඇත

    ReplyDelete
  7. @buwa,

    ඔබ නොදන්නා දේ ගැන කතා නොකර සිටින්නේ නම් හොඳයි කියා හිතනවා.

    යුද්ධ කිරීමේදී රැකිය යුතු, ශ්‍රී ලංකාවද ඇතුළු රටවල් ගණනක් විසින් එකඟ වූ නීති පද්ධතියක් තියෙනවා. ප්‍රශ්නය ඒවා බිඳී ඇත්ද නැද්ද යන්න මිස යුද්ධ කිරීමට හේතුව හෝ අනෙක් රටවල් ඒවා බින්දාද නැද්ද යන්න නෙවෙයි. වෙනට රටක් නීති බින්දා කියා අපට නීති බිඳීමට විශේෂ අවසර නෑ.

    යුද්ධයේ අවසාන අදියර තුළ සිදු වූ දේ දැන ගත හැක්කේ එහි සිටි පාර්ශවයන්ගෙන් පමණයි. කොළඹ හිටි එවුන් දන්න ඉලව්වක් නෑ. මේ කමිටුව ශ්‍රී ලංකා හමුදාවන්ගෙන් ප්‍රශ්න කරන්නට උත්සාහ දැරුවත් ඊට ඉඩක් ලැබුණේ නෑ. ඔවුන්ට ලංකාවට ඒමට පවා අවස්ථාවක් දුන්නේ නෑ. හැමදේම හැංගුවා. එහෙම කරලා දැන් වාර්තාව ඒක පාර්ශ්විකයි කියලා චෝදනා කළ හැක්කේ ජෝකරයෙකුට විතරයි.

    මහින්ද මාමාගේ රෙදි ගැලවෙන විට අනික් අයත් රෙදි ගලවන්න ඕනැ නැහැ.

    ReplyDelete
  8. "සිංහලේ දේශප්‍රේමී හැක්පෙටිපොළ බලකායේ නාමල් උඩලමත්තතුමා මිගාර වීරක්කොඩි දොස්තරතුමා හා වැප් නිශාන්තතුමා මේ පිළිබඳව තම මතය නුදුරු අනාගතයේදී පළ කරනු ඇත. විමසිල්ලෙන් සිටින්න.

    ඒ සමඟම පාස් වර්ඩ් ප්‍රොටෙක් කර ගන්නා ලෙස සියළු අවජාතකවාදීන්ට නැවත මතක් කරනු ලැබේ."

    ඇයි මහා හිංගල බවුද්ද රංග ජයවර්ධන උතුමා අමතක උනාද? මහා වීර හැක්පෙටිපොළ බලකායේ

    සභාපති - රංග ජයවර්ධන
    කැඳවුම් කරු - වැප් නිශාන්ත
    වොටර් බෝයි - කණිශ්ක ඩිල්ෂාන්

    ReplyDelete
  9. ඔය අචාර ධර්ම රැකගෙනද ඇමරිකාව ඇෆ්ගනිස්ථානෙ , ඉරාකෙ යුද්ධ කලේ , අදත් පකිස්ථානෙ ගම් වලට බෝම්බ දාන්නෙ .. කෝ ඒව ගැන කමිටු , වාර්තා , අදහස් විමසීම් . මෙතන තියන ප්‍රශ්නෙ ඇමරිකාව නීති බින්දාද නැද්ද කියන එක නෙවෙයි එක්සත් ජාතින්ගේ සංවිධානය අපිට එක විදිහකටත් , ඇමරිකාවකට එක විදිහකටත් සලකන එක . ඔය කමිටුව පත් කලාය කිව්වෙ මූන් මහත්තයට උපදෙස් ගන්න මිසක් ලංකාව ගැන විමර්ෂනයකට නෙවෙයිනේ , එක්සත් ජාතින්ගේ සංවිධානෙ හරි ආරක්ෂක මණ්ඩලෙ හරි තීන්දුවක් අනුව හරි ලංකාව ගැන විමර්ශනය කරපු කමිටුවකට නම් ලංකාවට එන්න ඉඩ දෙන්නත් , යුද්ධෙ මෙහෙවපු අය එක්ක කතා කරනත් ඉස දෙන්න තිබුනා , මේ අය මේ වෙනකොටත් තම්න්ගෙ කාර්යභාරයට අදාල නැති (ලෝකයා හමුවේ කියපු කාර්ය භාරය ) වාර්ථාවක් ඉදිරිපත් කරල තියෙන්නෙ , ලංකාවට ආවනම් වෙන්නේ ඕකට අනුබල දීමක් විතරයි . මේ කමිටුව පත්නොවෙන තැනට වැඩ කිරීමෙ වගකීමක් රජයට තිබුන තමයි නමුත් මේ වෙලාවෙ වඩා වැදගත් මේ වාර්ථාවට ලංකිකයින්ගෙ විරෝධය පල කරන එක , මතක තියා ගන්න ලංකාවට විරුද්ධව සැහෙන පිරිසක් ලෝකය පුරාම ක්‍රියාත්මක වෙලා ඉන්නව , ජාත්‍යන්තර සංවිධාන වලට දැනට දැනෙන්නෙ ඒ අයගෙ හඬ විතරයි . අපිත් අපේ හඬට තැනක් අරගන්න ඕනි ..මහින්දගෙ රෙදි ගැලවෙනවද නැද්ද කියන එක මට ගැටලුවක් නෙවෙයි , හැබැයි මෙතන්දි නම් රෙදි ගලෝගෙන තියෙන්නෙ තම්න්ගෙ බලතල ඉක්මවා කමිටු හදපු ඇයින්ගේ සහ තම්න්ගෙ කාර්යට පිටින් ගිහින් වාර්තා හදාපු ඇයින්ගෙ

    ReplyDelete
  10. @buwa,

    උතුරේ යුද්ධයේ අවසාන අදියරේදී යුධ අපරාධ වුණාද නැද්ද කියන එකට ඔය කියන බයිලා එකක් වත් අදාළ නෑ. එකම ප්‍රශ්නය යුද්ධ අපරාධ වුණාද නැද්ද කියන එක විතරමයි.
    :-) :-) :-)

    ReplyDelete
  11. යුධ අපරාද උනාද නැද්ද කියල හොයන්න වත් ඒ ගැන ලංකාවෙ රජයට චෝදනා කරනවත් නිර්දේශ ඉදිරිපත් කරන්නවත් මූන් අන්කල්ගේ කමිටුවට බැ , අයිතියක් නැ

    ReplyDelete
  12. @ Buwa

    යුද්ධය කාලය තුල සිදුවුන සිදුවීම් මොහොතකට පැත්තකින් තියමු.මෙවැනි මැදිහත්වීම් සදහා ඉඩ හැදෙන්නේ යුද්ධයෙන් පස්සෙත් ලංකාවේ රජය දමිල ජනතාව මත සුවිශේෂ පීඩනයක් පවත්වාගෙන යන නිසාය කියන තර්කය ප්‍රතික්ෂේප කරන්න පුලුවන්ද?ඔබේම නිදසුනින් කියනවා නම් ගෙදර මහ එකා නරකයි නම්,ගෙදර උදවියට වෙනස්කම් කරයි නම් පිට අයට මැදිහත්වෙන්න අවකාශය හැදෙන්නෙ එතනදී.මැදිහත්වීමට පසුබිම සකස් කල ගෙදර මහ එකාගෙ තක්කඩිකම ගැන කිසිම දෙයක් නොකිය මැදිහත්වෙන එක ගැන වියුක්තව කතාකරන එක අමන වැඩක් නේද?දෙමල ජනතාව කෙරෙහි දෙවන පංතියේ සැලකීමක් සිදුවුනු ආකාරය නිදර්ශන ගනනක් මගින් ලිපියේ කතාකරල තියෙනවා.ඒ වගේ දේවල් වෙමින් පවතිනවා කියන එක ප්‍රතික්ෂේප කරන්න පුලුවන්ද?

    ReplyDelete
  13. මැදිහත් වීමට අවකාශය සැලසීම සම්බන්දයෙන් රජයට වගකීම එල්ල වන බව සැබැය . එය ඔබ පවසන පරිදි දෙමල ජනතාව වෙත එල්ල කෙරුණු බලපැම මෙන්ම නිසි රාජ්‍යතාන්ත්‍රික ක්‍රියාමාර්ග ගැනීම ට අපොහොසත් වීම ලෙසින්ද සඳහන් කල හැකි බව මගේ හැඟීමයි . මින් පලමු කාරනය (දෙමල ජනතාව ) හැසිරවීමෙදී ප්‍රායොගිකව පැන නගින ගැටලු සහගත තත්වයන් නිසා ඇති වන ජාත්‍යන්තර බලපැමක් වුවත් නිසි ක්‍රියාමාර්ග වලින් වලකා ගැනීමට ඉඩ තිබුනි . නමුත් අදාල කමිටුවට ශ්‍රි ලංකා රජයේ ක්‍රියාපටිපාටින් විවේචනයට බලතල තිබේද ? ඔවුන්ගේ වාර්ථාවේ සඳහන් පරිදි ලංකා රජය විසින් කල යුතු දැ නිර්දේශ කිරීමට බලතල තිබේද යන්න ගැටලුවකි . මන්ද එය හඳුන්වාදී ඇත්තේ හුදෙක් මූන් මහතාගේ උපදේශක කමිටුවක් ලෙස පමණකි . එවන් කමිටුවකට ප්‍රජාතන්ත්‍රවාදී රාජ්‍යයක කටයුතු උදෙසා නිර්දේශ නිකුත් කිරීමේ බලයක් තිබේද ? මෙම කමිටුව එක්සත් ජාතීන්ගේ ප්‍රතිපත්තීනට අනුකූල නිල කමිටුවක් නම් මේ අයිතීන් ඇති බව මම පිලිගනිමි . එනිසා මගේ අදහස නම් මෙම අවස්තාවේ ශ්‍රි ලාංකික යින් ලෙසින් මෙම වාර්ථාව ප්‍රතික්ශේප කල යුතු බවයි .එය පාර්ලිමෙන්තුව වශයෙන් දේශපාලන පක්ෂ වශයෙන් මෙන්ම පුරවැසියන් වශයෙන්ද කල හැක . මේ සඳහා රජයට වුවමනාවක් තිබේද ? විපක්ෂනායකවරයා සූදානම්ද ? රජය මේ තුලින් දේශපාලන වාසි ලබාගැනීමට බලාපොරොත්තු වෙනවාද ? යන්න තවමත් ගැටලුවක් වුවත් ශ්‍රි ලාංකිකයෙකු ලෙසින් ලක් රජයවෙත් එල්ල වන "අසාධාරණ" චෝදනාවකට විරුද්ධ විම යුක්ති සහගත යැයි සිතමි

    ReplyDelete
  14. අනේ අපිට මේ නාට්ටිය තේරෙන්නෑ.
    අපි බබාලා

    ඌ..ඌ...ඌ....

    ReplyDelete
  15. වන්ස් අපෝන් අ ටයින්
    බැංකි බිව්ව වයින්
    වීරෙ ළඟට ගොයින්
    වීරෙ දුන්න පයින්

    ReplyDelete
  16. @ BuWa

    අදහස් දැක්වීමට ස්තුතියි.නමුත් මා නැවතත් පවසන්නේ මෙය හුදෙක් ලංකාවට එරෙහි චෝදනාවකට දේශපාලන පක්ෂ සියල්ලම එකතු වෙලා විරෝධය දැක්වීම වගේ සරල කාරනයක් නොවන බවයි.යුද්ධය අවසන් වූ විට අවතැන් වූවන් නැවත පදිංචි කිරී‍මේ ක්‍රියාදාමයට උදවු කිරීම සදහා විපක්ෂය අවස්ථාව ඉල්ලුවද එම අවස්ථාව ලබා දුන්නේ නැත.අත්අඩංගුවේ සිටින සැකකරුවන් සම්බන්ධ ප්‍රශ්නය විපක්ෂය මතු කල විට විපක්ෂයට චෝදනා කලේ ඔවුන් කොටි ඒජන්තයන් වී ඇති බවටයි.උතුරේ දේශපාලනය කරන්නවත් විපක්ෂයට අවස්ථාවක් හිමිවුනේ නැත.එය තනිකර ඊපීඩීපී සංවිධානයේ රජයේ හා තාරුන්‍යට හෙටක් සංවිධානයේ තනි අයිතියට ලියා ගනු ලැබුවා.මෙම ප්‍රශ්නයේදී විපක්ෂයට එලව එලවා ගැසූ,තනි මතයට වැඩ කල,එමගින් සිය ආත්මාර්ථකාමී අපේක්ෂා මුදුන් පත් කරගැනීමට කටයුතු කල ආන්ඩුව (තමාගේම අඥාන ක්‍රියාවන් මත) වැ‍ඩ වැරදුනු බව දැනගත් විට පමනක් වංකව,ව්‍යාජ එක්සත්බවක් මවා පාමින් "පක්ෂ භේද අත්හැරල හැමෝම මාත් එක්ක එකතු වෙන්න" යැයි කීම මට අනුව හුදු තක්කඩිකමකි.

    එසේම මූන්ගේ වාර්තාව "ඒකපාර්ශවික" "අසාධාරන" එකක් යැයි කීමටද මම හදිස්සි නොවෙමි.වාර්තාවේ සදහන් බොහෝ කරුනු සිතට එකගව බැලූ කල්හි අසත්‍ය නොවන බව ඔබටම වැටහෙනු ඇත.එක්සත් ජාතීන් සම්බන්ධ මගේ විවේචනය පවතිනුයේ බලවත් රටවලට එක් හැන්දකින් සහ දුබල රටවලට වෙනත් හැන්දකින් බෙදීමේ දෙබිඩිභාවය සම්බන්ධවය.එය ඇත්තකි.නමුත් විශේෂයෙන් පශ්චාත් යුද කාලීන සිදුවීම් පිලිබද වාර්තාවේ සදහන් කරුනු - ඒවා බොරු යැයි කියා සිත සාදාගැනීම අවංකව සිදු කල නොහැක්කකි.

    ReplyDelete
  17. මේ ගැන අප දෙදෙනා දරන්නේ එකිනෙකට වෙනස් මත වාදයන් දෙකකි .ඔබ දෙමල ජනතාව පිලිබඳ කරුණු වල වැදගත් කම දකිත්දී මා කමිටුවේ කාර්ය බාරයේ වරද දකින්නෙ එනිසාය , රජය මේ වෙනුවෙන් විපක්ෂයේ සහයක් බලාපොරොත්තු වන බවක් තවම නම් පෙන්නෙ නැත , ජවිපය සුපුරුදු පරිදි දෙපැත්තටම බනිමින් ප්‍රකාශයක් නිකුත් කර ඇත , සජිත් මහතාගෙ මාධ්‍ය නිවේදනය මූන් ගේ කමිටුවට විරෝධයකට වඩා සංධානයේ මැතිවරන ප්‍රචාරනයකට සුදුසුය , තව දැකීමට ඉතිරිව ඇත්තේ විපක්ෂනායක තුමාගේ ප්‍රතිචාරය පමනි . අනුන්ගේ මතවාද පාගාදමන්න්ට උත්සහ නොකරන ඔබ වැන්නකුගේ බ්ලොග් අඩවියේ ප්‍රතිචාරයක් පලකිරීමට හා ඒ ගැන කතා බහක යෙදිමට ලැබීම සතුටට කාරණයකි

    ReplyDelete
  18. අල්ජසිරා ඇමරිකන් ගැතියි, ලිබියා යුද්ධ්යේදී එක හොදට පේනව, යුද අපරාධ තියා ගහන එකවත් නවත්තගන්න බැරිවුනු යූඇන් එක දැන් අපිට ඇගිලි ගහන්න එනව. මෙහෙ ප්‍රශ්න අපි බලාගන්නම් , පිට අයට ඒව අදාල නැත.

    ReplyDelete
  19. "මෙහෙ ප්‍රශ්න අපි බලාගන්නම්, පිට අයට ඒව අදාල නැත."
    by the way who is "අපි"?

    If UN/West/East/North etc. are willing to support "the war against LTTE" they are welcome (and rewarded). But if they raise "human right/war criminals", this is our country "we" can solve "our" problems. :D :D.

    ReplyDelete
  20. බේබදු හීරළුවාApril 18, 2011 at 9:46 PM

    යුද්ධයකදී ඕනෑම දෙයක් කරන්නට ඉඩ දිය යුතුයි, ඉන්පසු යුද අපරාද පිළිබඳ චෝදනා එල්ල වෙද්දී අපේ රටේ නායකයින් ඒවා කළ නිසා සැඟවිය යුතුයි කියන ප්‍රවණතාවය හරිම භයානක එකක්. ඒක අන්තර්ජාතික මට්ටමින් ඉතාම වැරදි පූර්වාදර්ශයක්. මොකද ඒ වගේ දෙයක් කළාට පස්සෙ ඕනෑම කෙනෙකුට ඕනෑම ජඩ වැඩක් කරලා අත සෝදා ගන්න පුළුවන් නිසා. මීට කලින් මේ වගේ දේවල් වුණේ නෑ. ප්‍රේමවතී මනම්පේරි ඝාතනය, ඇඹිලිපිටියේ සිසු ඝාතනය වගේ ක්‍රියාවලට නඩු අහලා වැරදිකරුවන්ට දඬුවම් ලබා දුන්නා. ඔවුන්ගේ යුද අපරාද සැඟවිය යුතුයි කියලා කවුරුත් කිව්වෙ නෑ. අහිංසක මිනිස්සු මරලා තියෙනවනම් කවුරු වුනත් කමක් නෑ ඒ පව් ගෙවන්න ඕනෑ. මහින්ද වුණත් එකයි, ගෝඨා වුණත් එකයි, ශවීන්ද්‍ර ද සිල්වා වුණත් එකයි. මොකද මේ කාටවත් අහිංසක මිනිස්සු මරන්න ලයිසන් දීල නැහැනෙ. මේ රටේ සාමාන්‍ය පුරවැසියන් කවුරු වුණත් මේ යුද අපරාදකරුවන් වෙනුවෙන් පෙනී සිටියයුතු නැහැ. නීතිඥයන්ට හෘද සාක්ෂිය කියලා දෙයක් තියෙනවා නම් ඔවුන්ට නෛතික සේවා ලබා දීමෙන් වැලකී සිටිය යුතුයි.

    ReplyDelete
  21. කමිටුව බෝලෙ උස්සලා දෙනවා.
    අපේ අයියලා මෙහෙ ඩෑශ් ගහනවා.
    කොහොමද සෙල්ලම.

    වීරෙ ගෙ චියර් ඵ්කත් මරු ආ...

    පට්ට නේ.

    ReplyDelete
  22. @ බුවා,
    අල්ජසීර මැදපෙරදිග අර්භුදයේදී ක්‍රියා කලේ කොහොමද කියල ඔබ කියන විදිහෙන් පේනවා ඔබ ඉන්නේ හරි වැරදි හොයා නොබලන ඇමරිකානු විරෝදයක බව...ඔබ හිතන විදිහට ඇමරිකාවට විරුද්ද නම් ලිබියාවට පක්ෂ වෙන්න ඕන...ඔබ දන්නේ නැතුවට අල්ජසීර විකාශනය කරන කටරය තමා මුලින්ම ගඩාෆි විරෝදී කණ්ඩායම නිල වශයෙන් පිළිගත්තේ...එක්සත් අරාබි එමීර් රාජ්‍ය සහ තුර්කිය තමා ගුවන් යන යැව්වා ගඩාෆිට පහර දෙන්න...මොවුන්ට ඇමරිකා පක්ෂපාතිත්වයක් නොවේ තියෙන්නේ..ඔවුන් දුටුවා ගඩාෆිගේ වියරුව....නිවැරදි ලෙස...දැනට ගල්ෆ් රටවල් සහ ඉරානය අතර දැඩි අර්බුදයක් පවතිනවා...සව්දිය ඔවුන්ගේ ඉරාන තානාපති ඉවත් කර ගැනීමට සැරසෙනවා...ඔවුන් චෝදනා කරනවා කලාපය අස්ථාවර කරන්න ඉරානය කුමන්ත්රණ කරන බවට...මෙය යුද්දයක් දක්වා වර්දනය උවොත් ඔබ කියයි ඇමෙරිකාවට ඕන නිසා යුද්දේ සිදුවුණා කියල...

    ReplyDelete
  23. Fully agreed with Bebadu Heeraluwa.

    ReplyDelete
  24. @රිටිගල ජයසේන - මා ඇමරිකානු විරෝධියෙක් නොවේ බොරු ඇමරිකානු විරෝධින් සමඟ බ්ලොග් අවකාශයේදී විවාද වලටත් පැටලී ඇත. :D

    මෙහිදි රාමච්න්ද්‍ර පැවසූ අදහස එනම් අල් ජසීර ඇමරිකානු විරෝධි නාලිකාවක් බව මම ප්‍රතික්ශේප කරමි මන්ද ඔවුන් ඇමරිකානු විරෝධීන් නම් මැදපෙරදිග අර්බුදයේදී හැරෙන්නෙ ඔය ලෙසින් නොවේ , ඒ හැර ජාත්‍ය්න්තර මාධ්‍යක් ලෙස ඔවුන්ගේ කාර්යයන් මා විවේචය කරන්නෙ නැත , නමුත් ඔවුන් මේ දෙස බලන ලෙසින් ම අපටත් ඒ දෙස බැලිය හැකියැයි මා සිතන්නෙ නැත

    ReplyDelete
  25. 1.කොටි සංවිධානය නැවත සංවිධානය වීමට ඇති ඉඩ කඩ ඇහිරීම සදහා රජයට සමහර තොරතුරු වල රහස්‍යභාවය ආරක්ෂා කරන්න සිද්ධ වෙනවා නේද?විශේෂයෙන් විදෙස් රටවල කොටි සංවිධානය තවමත් හොදින් ක්‍රියාත්මකවන වාතාවරණයක් තුල?

    2.පස්චාත් යුධ සමයේ පුනරුත්තාපනය වූ කොටි සාමාජිකයන් පිළිඔද වාර්තා සියල්ල බොරුද? විශ්ව විද්‍යාලයට තේරුණ බවට,කණ්ඩායම් කීපයක් වෘත්තීය පුහුණුව ලබා විසිර ගිය බවට, අවතැන් වූවන් කොටසින් කොටස නැවත පදිංචි කළ බවට(මුලුමනින්ම අවසන් බවක් කවුරුත් කියල නෑ නේ), පලවූ මාධ්‍යය වාර්තා සියල්ල අමූලික බොරු යයි ඔබට කිව හැකිද?

    ReplyDelete
  26. @ ජය ශ්‍රී

    1.පලමු ප්‍රශ්නය තරමක් අපැහැදිලි නිසා එය වැඩිදුරටත් පැහැදිලි කල හැකිද?රජය විසින් "සැගවිය යුතු" යැයි ඔබ කියන තොරතුරු මොනවාද?විදෙස් රටවල කොටි සංවිධානය සංවිධානය උනා කියා මේ රට තුල කල හැකි උලවුවක් නැති බව මගේ අදහසයි.මෙරට දෙමල ජනයාගේ අයිතිවාසිකම් පිලිගෙන,ඔවුන්ගේ විශ්වාසය දිනාගන්නා අන්දමට රජය කටයුතු කරනවා නම් ( දැන් වගේ වෙනස් කොට සලකලා මර්ධනකාරී පීඩනයක් පතිත කරන්නේ නැතිව) විදෙස්ගතව සිටින කූල්ටූර් ඊලාම්වාදින්ට කිසිදු වලංගුතාවයක් මේ රට තුල නිර්මානය වන්නේ නැත.

    2.වෘත්තිය පුහුනුව ලබා විසිර ගිය හෝ විශ්වවිද්‍යාලයට තේරුනු කොටි සාමාජිකයන් ගැන නම් මට අවබෝධයක් නැත.නමුත් පේරාදෙනියේ ඉගෙන ගනිමින් සිටි ( කාලයකට ඉහත කොටි සංවිධානය විසින් බදවාගනු ලැබ පසුව ඉන් ඉවත්වූ ) රාසයියා ද්වාරකා වැනි අයව අලුතින් අත්අඩංගුවට ගෙන ඇති බවත්,එවැනි දහස් ගනන් රජයේ අත්අඩංගුවේ හදිසි නීතිය යටතේ රදවාගෙන ඉන්නා බවත්,අඩුම තරමින් එසේ රදවාගෙන ඉන්නා අයගේ නම් ලැයිස්තුවක්වත් හෙලිදරවු කොට නැති බවත්,තම දරුවා මියගොස්ද අත්අඩංගුවේද යන්න දන්නේ නැතිව උතුරේ බොහෝ මවුපියන් හමුදා කදවුරු ගානේ රස්තියාදු වන බවත්,රදවාගෙන සිටින සමහරුන් වසර 20 පමන නඩු පැවරීමක්වත් නැතිව රදවා ගෙන ඉන්නා බවත්,නඩු පැවරීමක් නොකොට මෙලෙස අන්තනෝමතිකව රදවා ගෙන සිටිම බරපතල මානව අයිතීන් උල්ලංඝනය කිරීමක් බවත් මම දනිමි.

    වේලාවක් ලැබේ නම් පහත වීඩියෝව නරඹන්න.

    http://www.youtube.com/user/ChamilleChannel#p/u/78/PTk_EpBShTc

    ReplyDelete
  27. මම අදහස් කලේ බුද්ධි තොරතුරු, සමහරවිට අත් අඩංගුවේ සිටින ප්‍රධාන පෙලේ කොටි නායකයන්ගේ තොරතුරු පවා ඔවුන්ට එරෙහිව නීතිමය ක්‍රියාමාර් ගැනීමෙන් තොරව හෙලි කිරීම රජයකට කළ නොහැකියි යයි මට සිතේ.ඔබ කියන පරිදි උතුරේ ජනතාව පීඩනයට යටත් කොට සිටී නම් මම කිසිසේත්ම ඒහා එකග නොවෙමි.නමුත් නීතිය ක්‍රියාත්මක වීමේ ප්‍රමාදයන් නිසා දකුණේ ද "නඩු නැතිව" හිරේ සිටින අවාසනාවන්තයින් ඉන්නවා නොවේද?"මෙහෙ ඉන්න නිසා එහෙත් හිටපුදෙන්" යයි මම කිසිසේත්ම නොකියමි.මගේ ද අපේක්ශාව සියලු දෙනාට සාධාරණ නඩුවිභාගයකට මුහුණදීමට ලැබීමයි.

    ReplyDelete