Saturday, February 13, 2010

සීතාම්බර පට දහසකින් සැරසුවද - රජතුමා හෙලුවෙනි


මොනවා කරමුද අපි
හඩමුද සිනාසෙමුද?

කා හට කියමුද අපි
ගැටෙමුද පලා යමුද?

- සුනිල් ආරියරත්න


පොලිසියේ ආරක්ෂාව සහිතව පොලු මුගුරු ගෙන පිවිසි පාතාල මැරයන් විසින් අලුත්කඩේ උසාවිය ඉදිරියේ සරත් ෆොන්සේකා වෙනුවෙන් පැවති විරෝධතා ව්‍යාපාරයට පහර දෙන ලදී.
ස්වාධීන රූපවාහීනිය මේ සිදුවීම වාර්තා කරමින් පැවසුවේ විරෝධතාවයට පැමිනි එජාප හා ජවිපෙ පිරිසක් උනුන් හා ගැටී මහා විපතක් වූ බවයි.
සරත් ෆොන්සේකා අත්අඩංගුවට ගැනීමට එරෙහිව රට පුරා ඇති වුන සාමකාමී විරෝධතාවයන්ට පොලිසිය විසින් පහර දෙන ලද අතර ඔවුන් විසුරුවා හරින ලදී.
මේ බ්ලොග් සටහන ඉහලින්ම පලවන්නේ මහරගම පැවති විරෝධතාවයට පහර දීමේදී ගනු ලැබූ ඡායාරූපයකි.විරෝධතාවයට සම්බන්ධ වූ බෞද්ධ භික්ෂුවකට පොලිසිය විසින් පහර දෙන මේ ඡායාරූපය වර්තමාන ලාංකීය දේශපාලන මුහුනුවර හකුලා දක්වන කැඩපතක් වැන්න.
ලංකාව ථෙරවාදී බුදු දහමේ මධ්‍යස්ථානය යැයි කියන රටකි.නග්න බලකාමය හමුවේ බෞද්ධකම,ආගම් භක්තිය ව්‍යාජ සැරසිලි පමනි.තමන්ට එරෙහිව ඒ නම් බෞද්ධ භික්ෂූන්ට වුව එලව එලවා පහර දෙන දේශපාලනය අපට ලබාදෙන පනිවිඩය කුමක්ද?
මේ පහර දීම් සිදුවනුයේ සෑම පෝයකදීම සිය නිවෙසට හාමුදුරු නමක් වැඩම්මවා රටටම පේන්න බන අහන පාලකයාගේ අන මතය.
බන අහන,පන්සල් වලට මල් වට්ටි පූජා කරන සැදැහැවත් පාලකයාගේ දැහැමි වැඩ නිසා මහා සංඝරත්නය පවා සසල වී ඇති සෙයකි.
දේශපාලකයන් තමා කියන දේට ඔලුව වැනුවාට එලියට ගියාම කරන්නේ තවෙකක් බවත් තමාට දේශපාලකයන්ට පන්සලට එන්න එපා කියන්න හිතෙන බවත් මල්වතු මහ නා හිමි අතුරුදන් වු ප්‍රගීත් එක්නැලිගොඩගේ බිරිදට පවසන්නේ පාලකයන්ගේ දැහැමි වැඩ ඒ තරම් සසල කරවන සුලු නිසාය.
ප්‍රජාතන්ත්‍රවාදී අයිතිවාසිකම් වෙනුවෙන් මහ සග සමුලුවක් මහ නාහිමිවරුන්ගේ කැදවීමෙන් රැස්වීමට යන්නේ පාලකයන්ගේ සැදැහැවත් චර්යාව විශේෂ සම්මේලනයක් කැදවීමට තරම් තැති ගන්වන සුලු එකක් වී ඇති නිසාය.

අනෙකා ගොරහැඩියෙකු බවත් මෙතුමා සංවේදී පිවිතුරු අයෙක් බවත් පසුගිය දෙමාසයක් පුරා ඔවුහු අපට දිගින් දිගට පැවසූහ.
අනෙකා බලයට ආ කල රට ඉඩි අමින්කරනය වන බවත් එය වලකාලනු වස් මෙතුමාට සහය දිය යුතු බවත් දවසේ පැය විසිහතර මුලුල්ලේ ඔවුහු පැවසූහ.
ජනතාව ඔවුන් කී මග යමින් ගොරහැඩියා වෙනුවට සංවේදී මිනිසා තෝරාගත්තේය.
නිකම් නොව ලක්ෂ 18ක මහා පරතරයක් සහිතවය.
දැන් සංවේදී කම වීදි පුරා කදුලු ගෑස් ආකාරයෙන් දෙගොඩ තලා යමින් තිබේ.සාමකාමී රැස්වීම මූලික අයිතියකි.ඒ මූලික අයිතිය අභ්‍යාස කරන්නවුන්ට වදින අධි පීඩන ජල ප්‍රහාර වල සංවේදීතාවය රූපවාහිනි තිර මත පතිත වෙමින් තිබේ.

ලංකාවේ එදා මෙදා තුර පහල වූ වඩාත්ම ආඥාදායක ස්වරුපී පාලකයා යැයි සැලකෙන රනසිංහ ප්‍රේමදාස හෝ විරුද්ධ පක්ෂයෙන් තමා හා ජනපතිවරනයට තරග කල "වරදට" විපක්ෂ අපේක්ෂකයා රාජ්‍ය විරෝධී චෝදනා මත සිර කිරීමට උත්සාහ නොකලේය.චෝදනා මත දන්ඩනයක් පැනවීම එකකි.දන්ඩනයක් පැනවීමේ පරම අභිලාෂය මත චෝදනා "අහුලමින් යාම" තවෙකකි.
සරත් ෆොන්සේකා හමුදාව තුල සිටියදී කරන ලද බව කියන විනය කඩකිරීම් වලට එරෙහිව යුද හමුදා අධිකරනයක් ඉදිරියට ඔහුව කැදවීමට රජය කටයුතු කරන බව පාලකයෝ අපිට කියති.
මෙතනදී පැන නගින ප්‍රශ්නය ඉතාම සරල එකකි.
හමුදාව තුල සිටියදී ඔයතරම් බරපතල වැරදි කල අයෙක්ට කිසිම අවුලක්/පරික්ෂනයක් නැතිව විශ්‍රාම යාමට ඔබලා ඉඩ දුන්නේ කුමකටද?
හමුදාව තුල සිටියදී රජය පෙරලීමට කුමන්ත්‍රනය කල අයෙක්ට අම්බලන්ගොඩ ශ්‍රීලනිප සංවිධායකකම ලබාදෙන්නට කේවල් කලේ කුමකටද?ඒ වෙනුවෙන් දනින් වැටුනේ යාප්පු වුනේ කුමකටද?
"ඔයාගෙ තීරනේට මම විරුද්ධ නැහැ.ඒත් ඕක වැරදි තීරනයක්.ජනාධිපතිවරනයට පස්සෙ ඒත් ඔයා මං ගාවට එන්න.එතකොට මම ඔයාව බාර ගන්නවා"
ෆොන්සේකා තමා ජනපතිවරනයට ඉදිරිපත් වන බව පැවසු විට ජනාධිපති රාජපක්ෂ පැවසූවා යැයි මාධ්‍ය විසින් වාර්තා කරන ලද්දේ ඉහත ප්‍රකාශයයි.
කෙතරම් ස්නේහවන්ත වචන පෙලක්ද?පිතෘ ස්නේහයෙන් කිති කැවුන කෙතරම් සංවේදී වචන සෙට් එකක්ද?
මේ තරම් ආදරයෙන් අමතන ලද්දේ,ජනාධිපතිවරනයට පසු තමා වෙත ආ විට "භාරගන්නවා" යැයි කියනු ලැබූයේ හමුදා සේවය තුල ඉදිමින් කුමන්ත්‍රනයක් සැලසුම් කල අපරාධකරුවෙක්ටද?
පාර්ලිමේන්තුව ගිනි තැබීමට "කුමන්ත්‍රනය" කලා යැයි පවසා ඇඩොල්ෆ් හිට්ලර් ජර්මානු කොමියුනිස්ට් පක්ෂය තහනම් කලේය.එහි සාමාජිකයන් ලක්ෂ ගනනින් සිර භාරයට ගත්තේය.
රටේ යහපැවැත්මට එරෙහිව "කුමන්ත්‍රනය" කරන බව පවසමින් චිලිහි ඔගස්තෝ පිනෝෂේ වසර ගනනක් තිස්සේ දහස් ගනනින් මිනිසුන් සිර භාරයට ගත්තේය.ඝාතනය කලේය.වසර ගනනින් ඔවුන්ව රදවා තබන ලද්දේය.
චරපුරුෂයෙක්ගේ පොරෝ පහරට ලියොන් ට්‍රොට්ස්කිගේ හිස බිලි වූයේ ස්තාලින්ගේ පාලනයට එරෙහිව "කුමන්ත්‍රනය" කිරීමේ චෝදනාවටය.
අධිපතිවාදී හා මිනිස් නිදහස තඹයකුදු නොතකන අධිකාරිවාදී උද්දච්ච පාලකයන්ගේ අදුරු හෙවනැලි වලින් ගහන ලෝක ඉතිහාසය මෙම කුමන්තන කතා ගැනත් ඒවා පසුපස තිබෙන ඇත්ත අරමුනු ගැනත් නොවරදින පාඩමක් ඕනෑම අයෙක්ට උගන්වයි.
යථාර්ථය තිබෙන්නේ ප්‍රකාශිත වචන වල නොව ඒ වචන පසුපස තිබෙන අරමුනු තුලය.
කුමන වචන මැතිරුනද ලංකාවේ විපක්ෂ දේශපාලන ව්‍යාපාරයේ නායකත්වය ලෙස මතුවෙමින් තිබූ සරත් ෆොන්සේකා හිරභාරයට ගෙන යුද අධිකරනය ඉදිරියට පැමිනවීම පසුපස තිබෙන්නේ සිය අසහාය බල පරාක්‍රමයට විරුද්ධ වීම නිසා,එසේ විරුද්ධ වීමට තරම් ධෛර්යයක් තිබුන පුද්ගලයාගෙන් පලි ගැනීම සදහා රාජපක්ෂ රෙජිමය තුල තිබෙන වෛරී,පිලිකුල් සහගත අරමුන මිස අනෙකක් නොවේ.
සීතාම්බර පට දහසකින් වසන්නට තැත් කලද රජතුමා හෙලුවෙනි!

විපක්ෂ දේශපාලන නායකයා යුද අධිකරනයට පැමිනවීමේ අලකලංචිය කොළඹ නගරයේ මෙසේ රගදැක්වෙද්දී නාමල් රාජපක්ෂ කිරුල හිමි කුමරා ඈත හම්බන්තොටින් දේශපාලනයට සම්ප්‍රාප්ත වීම සිදුවිය.සජින් වාස්ගේ සභාපතිත්වයෙන් ගුවන් සේවයක් පිහිටුවිමට අවසර දි ඇති බව පසුගිය සතියේ රාවය මුල් පුවතින් කියැවින.රාජ්‍ය සේවකයෙක් වන ගෝඨාභය "රාජපක්ෂ" මැතිවරන නීති අමු අමුවේ උල්ලංඝනය කරමින් පසුගිය දිනවල ජනාධිපතිගේ මැතිවරන ප්‍රචාරනයට හවුල් වූ අතර යෝෂිත "රාජපක්ෂ" නම් නාවික හමුදාවේ නිලධරයා (නැවතත් රටේ නීතිය කඩමින්) මැතිවරන වේදිකා මතට ගොඩවිය.මේ සියලු කොටස් එකතු කොට තනි චිත්‍රයක් සදා ගත් කල මැවෙන්නේ සුපිරි තනි පවුලක සදාකාලික බල ආශාව පිලිබද චිත්‍රය මිස වෙන කවරක්ද?

මේ වූ කලී ගොනා හැරෙන්නේ පොල් පැලය දෙසටදැයි තර්ක කරමින් කල් මර මරා සිටිය යුතු කාලයක් නොවේ.සංවේදි ගවයන් ඇත්තටම පොල් පැල කනවාද?ඒවා කරන්නෙ ඉඩි අමින් වගේ කැත මූනක් තියන අය විතරයි නේද?ලස්සනට හිනාවෙන අයට ඒවා කරන්න පුලුවන්ද ආදී මනෝමූලික ගොංපාට් තමාගෙන්ම අසමින්,ඒ ගැන වීරවංශ හෝ සෝමරත්න දිසානායක වැනි සදාචාරාත්මකව වැහැරුන අයවලුන්ගෙන් ටියුෂන් ගනිමින් සිටීමට කාලයක්ද නොවේ.
ඒකාධිපතිවාදය යථාර්තයකි.
යථාර්තයට මුහුන නොදිම නිවටකමකි.

3 comments:

  1. මේකට නියම උත්තරේ දුන්න සෝමරත්න දිසානායක කියන පණුවා මිනිහ කියනව (රුපවාහිනියෙ හරි ITN හරි නිවුස් වලට) සරත් ෆොන්සේකව මේ විදියෙ අසරණ තත්ත්වයකට ඈදල දැම්මෙ යු එන් පි එකයි ජේ වි පි එකයි එකතු වෙලාලු.එතුමාව ජනාධිපතිවරණෙට ඉදිරිපත් කරලා විනාශ කළේ උන්ලු.එහෙම නොකළ නම් එතුමා ජාතික වීරයෙක් හැටියට තාමත් ඉන්නවලු.මොකද්ද මේකෙන් කියවෙන කතාව. ඒ කියන්නෙ සරත් ෆොන්සේකා ජනාධිපතිවරණෙට නොඉල්ලුව නම් මේ කිසි කුමන්න්‍රණ කතාවක් නෑ.එතකොට එහෙනන් එතුමා හමුදාපති ධුරයෙ ඉද්දිම කුමන්ත්‍රණය කළා කියන කතාව?මොකද්ද මේ පරස්පරය?මේ වගේ ජරා කලාකාරයො ඈත්ත දැන දැනම කඩේ යන හැටි මේකෙන්ම පේනව.උන්ගෙ සැබෑ තත්ත්වය එළියට එන්නෙ අදහස් ප්රකාස කරන්න ගත්තමයි

    ReplyDelete
  2. තවම පටන් ගත්ත විතරයිනෙ.තව ඉස්සරහට හොද හොද සෙල්ලම් නටයි.කොහොම උනත් අන්තිමට උනෙ බෝම්බ තියල සිOහලයො මරපු කොටි රජ ගෙදරට ගෙනත් ඇමති කම් දුන්න.යුද්දෙ දිනපු හමුදාපති හිරේ ගියා...මේක නේන්නම් දෙයියනේ කට්ටිය ඉල්ලපු සුභ අනාගතේ...

    ReplyDelete
  3. මේකට තමා ධනේෂ්වරයේ අර්බුදය කියන්නේ. පීඩිත මිනිසුන්ගේ සෑබැ ප්‍රශ්න වලට මේ පවතින සමාඡ ක්‍රමයේන් උත්තර හොයන්න බෑ. මේක මහින්දගේ පුද්ගලික අඩුවක ප්‍රතිඑලයක් ලෙස සෑලකීම වැරදියි. බන්දුල ගුණවර්ධන කියන්නේ ඇත්ත බඩු මිල අඩුකරන්න බෑ කිසිවෙකුට. එක හරියට x = y + constant සමීකරණයේ y නියතව තියාගෙන x අඩුකරන්න හදනවා වගේ (දේශපාලන අර්ථික විද්‍යාවෙන් තේරුම් ගන්න). කතුවරයා හිතනවනම් මේක මහින්දගේ අවුලක් කියලා ඔහු විශාල න්‍යායික අර්බුදයක ඉන්නේ (නමුත් ඔහුගේ සියලු ලිපි වල සරාංශය ගත් විට එහෙම දෙයක් පේන්න නේ).

    ReplyDelete